കൊച്ചി: താരസംഘടനയായ അമ്മയുടെ നേതൃത്വത്തിൽ സംഘടിപ്പിക്കുന്ന നൃത്തശിൽപ്പശാലയ്ക്ക് തുടക്കം. സംഘടനയുടെ പ്രസിഡന്റ് മോഹൻലാൽ ശിൽപശാല ഉദ്ഘാടനം ചെയ്തു. പൊതുജനങ്ങളെ ചേർത്തുനിർത്തി ആദ്യമായാണ് അമ്മ ഇത്തരത്തിൽ നൃത്ത ശിൽപ്പശാല സംഘടിപ്പിക്കുന്നത്.
രണ്ടു ദിവസം നീണ്ടു നിൽക്കുന്ന ശിൽപ്പശാലയ്ക്ക് നടിയും നർത്തകിയുമായ രചനാ നാരായണൻ കുട്ടി നേതൃത്വം നൽകും. കലാകാരൻമാർക്ക് കൂടുതൽ ഉപകാരപ്രദമായ എന്തെങ്കിലും ചെയ്യണമെന്ന ആശയമാണ് ഇത്തരമൊരു നീക്കത്തിലേക്ക് നയിച്ചതെന്ന് ജനറൽ സെക്രട്ടറി സിദ്ദിഖ് പറഞ്ഞു.
കലാകാരൻമാർക്ക് കൂടുതൽ ഉപകാരപ്രദമായ എന്തെങ്കിലും ചെയ്യണമെന്ന ചർച്ച എക്സിക്യൂട്ടീവ് കമ്മിറ്റിയിൽ വന്നതോടെയാണ് ഇത്തരമൊരു ആശയത്തെക്കുറിച്ച് ആലോചിച്ചത്. ഡാൻസും അഭിനയവും പഠിപ്പിക്കുന്ന ഒരു വിദ്യാലയം എന്ന രീതിയിൽ ആലോചിച്ചെങ്കിലും പരിമിതമായ സൗകര്യങ്ങൾ അതിന് പര്യാപ്തമല്ലെന്ന വിലയിരുത്തലിനെ തുടർന്നാണ് ഇങ്ങനെ തുടങ്ങാൻ തീരുമാനിച്ചതെന്നും സിദ്ദിഖ് പറഞ്ഞു.
നൃത്തം മാത്രമല്ല അഭിനയ രസങ്ങൾ നൃത്തശിൽപശാലയിൽ പകർന്നുനൽകുന്നുണ്ടെന്ന് മോഹൻലാൽ പറഞ്ഞു. ജീവിതം മുഴുവൻ അത്തരം ഭാവപ്രകടനങ്ങളിലൂടെയാണ് എല്ലാവരും കടന്നുപോകുന്നത്. ഒരു ദിവസം നമ്മൾ പല തരത്തിലുളള അഭിനയം കാഴ്ചവക്കുന്നുണ്ട്. ഈ സംരംഭത്തിലേക്ക് എത്തിച്ച എല്ലാവർക്കും നന്ദി പറയുന്നുവെന്നും മോഹൻലാൽ പറഞ്ഞു.
തിരഞ്ഞെടുക്കപ്പെട്ട 30 ഓളം വരുന്ന നൃത്ത കലാകാരന്മാരാണ് ശിൽപ്പശാലയിൽ പങ്കെടുക്കുക.
