മലയാള സിനിമയിൽ സ്ത്രീ പ്രാതിനിധ്യം ആരും മനപ്പൂർവം കുറയ്‌ക്കുന്നില്ലെന്ന് നടി ഭാവന. സിനിമ എന്നാൽ ബിസിനസ് ആണെന്നും മാർക്കറ്റ് വാല്യൂ ഉള്ളവരെ വെച്ച് സിനിമ എടുക്കാനാണ് എല്ലാ നിർമ്മാതാക്കളും ആഗ്രഹിക്കുന്നതെന്നും ഭാവന പറഞ്ഞു. സ്ത്രീ പ്രധാന വേഷം ചെയ്യുന്ന സിനിമകൾ ഹിറ്റാകുമ്പോഴാണ് അവരെ വെച്ച് വീണ്ടും സിനിമ ചെയ്യാൻ ധൈര്യം വരുന്നതെന്നും ഒരു ഓൺലൈൻ മാധ്യമത്തിന് നൽകിയ അഭിമുഖത്തിൽ താരം പ്രതികരിച്ചു.
“മലയാള സിനിമയിൽ സ്ത്രീ പ്രാതിനിധ്യം ആരും മനപ്പൂർവ്വം കുറയ്ക്കുന്നതല്ല. സിനിമ എന്നാൽ പ്രധാനമായും ബിസിനസ് ആണ്. ഹീറോയ്‌ക്ക് ഒരു മാർക്കറ്റ് ഉണ്ടാവും. ഞാൻ സിനിമ നിർമ്മിച്ചാലും അതുതന്നെയാണ് ഓർക്കുക. ആർക്കാണ് നല്ല ബിസിനസ്, ആരെ വെച്ച് ചെയ്യാം എന്നതാണ് നിർമ്മാതാക്കൾ ആലോചിക്കുന്നത്. ഇറക്കിയ പൈസ തിരിച്ച് കിട്ടുക എന്നതാണ് നിർമ്മാതാക്കളുടെ ലക്ഷ്യം”.
“ആരെയും കുറ്റം പറയാൻ കഴിയില്ല. സിനിമ അങ്ങനെയാണ്. ഒരു സ്ത്രീയെ വെച്ച് സിനിമ ചെയ്യുമ്പോൾ അവർക്ക് എത്ര ബിസിനസ് ഉണ്ടോയെന്ന് നിർമ്മാതാക്കൾ ആലോചിക്കുന്നതിൽ തെറ്റില്ല. സ്ത്രീകളെ വച്ച് ചെയ്യില്ല എന്ന് തീരുമാനിച്ചിട്ട് വരുന്നതല്ല ഒരാളും. സ്ത്രീയെ വച്ച് ചെയ്ത സിനിമ ഹിറ്റ് ആകുമ്പോഴാണ് വീണ്ടും ഒരു സിനിമ പ്ലാൻ ചെയ്യുന്നത്. തുടരെ തുടരെ ഒരു നായികയെ വച്ച് എടുത്ത സിനിമകൾ ഹിറ്റ് ആവുകയാണെങ്കിൽ ഉറപ്പായും ഒരു സ്പേസ് ലഭിക്കും. അതല്ലെങ്കിൽ ആരെയും കുറ്റം പറയാൻ കഴിയില്ല. ആരെയും വിരൽചൂണ്ടി ഇയാള് കാരണമാണെന്ന് പറയാൻ കഴിയില്ല”-ഭാവന പറഞ്ഞു.
