“പാർക്കിലെ വെള്ളിച്ചങ്ങല മോഷണം പോയിട്ട് കണ്ടുപിടിച്ച് തന്നില്ല; ഏത് പൊട്ടനും കണ്ടെത്താം”; എസ്‍പിയെ പൊതുവേദിയിൽ അപമാനിച്ച് പി. വി അൻവര്‍ എംഎല്‍എ

മലപ്പുറം: ജില്ല പൊലീസ് മേധാവിയെ പൊതുവേദിയിൽ അപമാനിച്ച് പി. വി അൻവർ എംഎൽഎ. മലപ്പുറം എസ്പി എസ്. ശശിധരനെയാണ് പൊലീസ് അസോസിയേഷന്റെ ജില്ലാ സമ്മേളന വേദിയിൽ എംഎൽഎ അധിക്ഷേപിച്ചത്. അപമാനിതമായതിന് പിന്നാലെ മുഖ്യ പ്രസം​ഗം ഒറ്റ വരിൽ ഒതുക്കി വികാരാധീനനായി എസ്പി വേ​ദി വിട്ടു. താൻ
അൽപം തിരക്കിലാണെന്നും പ്രസം​ഗിക്കാനുള്ള മാനസികാവസ്ഥയിൽ അല്ലെന്നും എസ്പി പറഞ്ഞു. ഇലന്തൂർ നരബലി കേസ് അന്വേഷിച്ച് ഉദ്യോ​ഗസ്ഥനാണ് എസ്പി ശശീധരൻ.

എസ്പി പരിപാടിക്ക് എത്താൻ വൈകിതാണ് എംഎൽഎയെ പ്രകോപ്പിച്ചത്.  ഐപിഎസ് ഓഫീസറുടെ പെരുമാറ്റം പൊലീസ് സേനയക്ക് തന്നെ നാണക്കേടാണെന്ന് പറഞ്ഞാണ് അൻവർ പ്രസം​ഗം ആരംഭിച്ചത്.  തന്റെ പാർക്കിലെ 2000 കിലോ ഭാരമുള്ള വെള്ളിച്ചങ്ങല മോഷണം പോയിട്ട് കണ്ടു പിടിച്ച് തന്നില്ല. അതിന് വേണ്ടി  ഒരു ഫോൺ കോൾ പോലും തന്നെ വിളിച്ചിട്ടില്ല. മലപ്പുറം എസ്പി ഇവിടെ ഇരിക്കുന്നുണ്ടല്ലോ. ഏത് പൊട്ടനും കണ്ടെത്താവുന്നതല്ലേയുള്ളു. തെളിവ് സഹിതം നിയമസഭയിൽ ഇക്കാര്യങ്ങൾ ഉന്നയിക്കുമെന്നും പിവി അൻവർ എംഎൽഎ പറഞ്ഞു.

പൊലീസുകാർ സ്വാർത്ഥ താല്പര്യത്തിന് വേണ്ടി പ്രവർത്തിക്കുകയാണ്. അതിൽ റിസർച്ച് നടത്തുകയാണ് അവർ. സർക്കാരിനെ മോശമാക്കാൻ ചില പൊലീസ് ഉദ്യോഗസ്ഥർ ശ്രമിക്കുകയാണ്. എസ്‍പിയെ കാത്ത് താൻ ഒരുപാട് സമയം ഇവിടെ ഇരിക്കേണ്ടി വന്നു. ജോലി തിരക്കാണെങ്കിൽ ഓക്കേ. അല്ലാതെ താൻ കുറച്ച് സമയം ഇവിടെ ഇരിക്കട്ടെ എന്നാണ് ഉദ്ദേശിച്ചതെങ്കിൽ എസ്‍പി ആലോചിക്കണം. ഒന്നു രണ്ട് കാര്യങ്ങൾ കൂടി പറയാനുണ്ട് അതു പറഞ്ഞാൽ സദസ് വഷളാവുമെന്നും എംഎൽഎ പറഞ്ഞു.