ഒരു പ്രത്യേക പ്രായം കഴിഞ്ഞാൽ ആരോഗ്യകാര്യങ്ങളിൽ വളരെ അധികം ശ്രദ്ധാലുക്കളാണ് നമ്മുടെ ചുറ്റുമുളളത്. തുടക്കത്തിൽ തന്നെ ചിട്ടയോടെ പോവുകയാണെങ്കിൽ എല്ലാ ആരോഗ്യപ്രശ്നങ്ങളേയും നമുക്ക് അകറ്റി നിർത്താൻ കഴിയും. ഇപ്പോൾ പലരിലും വളരെ അധികം കണ്ടുവരുന്ന ഒരു പ്രശ്നമാണ് പ്രമേഹം. ഓരോ വർഷം കഴിയുന്തോറും പ്രമേഹ രോഗികളുടെ എണ്ണത്തിൽ വലിയ വർദ്ധനവ് ഉണ്ടാകുന്നുണ്ടെന്നാണ് റിപ്പോർട്ടുകൾ സൂചിപ്പിക്കുന്നത്. വലിയ ആശങ്ക ഉണ്ടാക്കുന്ന റിപ്പോർട്ടാണെങ്കിലും, ഒന്ന് ശ്രദ്ധിച്ചാൽ വളരെ കൃത്യമായി കൈകാര്യം ചെയ്യാൻ കഴിയുന്ന പ്രശ്നമാണ് പ്രമേഹം. ഭക്ഷണത്തിൽ വരുത്തുന്ന നിയന്ത്രണങ്ങളിലൂടെ പ്രമേഹം കൃത്യമായി നമ്മുടെ വരുതിയിൽ നിർത്താൻ പറ്റും. പ്രമേഹം ഉള്ളവർ ഒഴിവാക്കേണ്ട ചില ഭക്ഷണങ്ങളുണ്ട്. അവയെ കുറിച്ച് അറിയാം.
1. ഹൈ കാർബ് ഭക്ഷണങ്ങളെയാണ് ഇക്കൂട്ടർ ആദ്യം പടിക്ക് പുറത്ത് നിർത്തേണ്ടത്. സ്നാക്ക്സ് ആയി സമൂസ, മോമോസ്, വടപാവ്, കച്ചോരി തുടങ്ങിയവ കഴിക്കാൻ ഇഷ്ടമുള്ളവർ ധാരാളമാണ്. എന്നാൽ വിശപ്പ് ശമിക്കുമെങ്കിലും രക്തത്തിലെ പഞ്ചസാരയുടെ അളവ് വളരെ അധികം കൂടാൻ ഇത് കാരണമാകും. അമേരിക്കൻ ഡയബറ്റിസ് അസോസിയേഷൻ നടത്തിയ പഠനം അനുസരിച്ച് കാർബോഹൈഡ്രേറ്റ്സ് അടങ്ങിയ ഭക്ഷണം കൂടുതൽ കഴിക്കുന്നത് ഹൈപ്പർഗ്ലൈസീമിയയ്ക്ക് കാരണമാകുന്നു.
2. പ്രോട്ടീൻ അടങ്ങിയ ഭക്ഷണം കൂടുതലായി കഴിക്കുക. ലഘുഭക്ഷണങ്ങളുടെ കാര്യത്തിലും പ്രോട്ടീൻ എന്ന ഘടകത്തിന് വലിയ സ്വാധീനമുണ്ട്. എണ്ണമയമുള്ള ഭക്ഷണം ഒഴിവാക്കുകയും പനീർ, കടല, പയർ വർഗ്ഗങ്ങൾ എന്നിവ അടങ്ങിയ സ്നാക്ക്സ് കഴിക്കുകയും ചെയ്യുക.
3. ലഘുഭക്ഷണങ്ങൾ കഴിക്കുന്നതിനും സമയം നിശ്ചയിക്കേണ്ടതുണ്ടെന്നാണ് പഠനങ്ങൾ പറയുന്നത്. തോന്നിയത് പോലെ ഇടയ്ക്കിടയ്ക്ക് എന്തെങ്കിലുമൊക്കെ കൊറിക്കുന്ന ശീലം ഒഴിവാക്കണം. രാത്രി വൈകി ഇത്തരം ഭക്ഷണങ്ങൾ കഴിക്കുന്നത് ടൈപ്പ് 2 പ്രമേഹം വരാനുള്ള സാധ്യത വർദ്ധിപ്പിക്കുന്നു.
4. എത്രത്തോളം കഴിക്കുന്നു എന്നതും ലഘുഭക്ഷണത്തിന്റെ കാര്യത്തിൽ പ്രധാനമാണ്. പോഷകം ധാരാളമുള്ളവയാണെന്ന് പറഞ്ഞാലും ഒരു പരിധിയിൽ കൂടുതൽ അവ കഴിക്കുന്നത് ഗുണത്തെക്കാളേറെ ദോഷം ചെയ്യും. ആവശ്യമുള്ള ഭക്ഷണം ചെറിയ അളവിൽ കഴിക്കുക എന്നതും ശ്രദ്ധിക്കേണ്ട കാര്യമാണെന്ന് ആരോഗ്യ വിദഗ്ധർ പറയുന്നു.
