ന്യൂഡൽഹി: ആപ്പിളിന്റെ പ്രോ മോഡലുകൾ ഇന്ത്യയിൽ നിർമിക്കുമെന്ന് റിപ്പോർട്ട്. ആറ് ലക്ഷം തൊഴിലവസരങ്ങളാണ് ഈ വർഷം അവസാനത്തോടെ രാജ്യത്തുണ്ടാവുക. ഏകദേശം 2,00,000 നേരിട്ടുള്ള തൊഴിലവസരങ്ങൾ സൃഷ്ടിക്കുമെന്നും ഇതിൽ 70 ശതമാനത്തോളം സ്ത്രീകളായിരിക്കുമെന്നാണ് പുറത്തുവരുന്ന വിവരം.
ഐഫോൺ 16 പ്രോ, പ്രോ മാക്സ് മോഡലുകൾ തമിഴ്നാട്ടിലെ ഫാക്ടറിയിൽ നിർമിക്കുമെന്നാണ് വിവരം. ഇത് സംബന്ധിച്ചുള്ള വിവരങ്ങൾ സെപ്റ്റംബർ ഒൻപതിന് നടക്കുന്ന ഗ്ലോടൈം ഇവൻ്റിൽ പ്രഖ്യാപിക്കുമെന്നാണ് ബ്ലൂംബെർഗ് റിപ്പോർട്ട് ചെയ്യുന്നത്.
സർക്കാരിന്റെ കണക്ക് പ്രകാരം ഇലക്ട്രോണിക്സ് മേഖലയിലെ ഓരോ നേരിട്ടുള്ള ജോലിയും മൂന്ന് പരോക്ഷ തൊഴിലവസരങ്ങൾ സൃഷ്ടിക്കുന്നു. ഇത് പ്രകാരം ആപ്പിൾ നടപ്പ് സാമ്പത്തിക വർഷത്തിൽ ആറ് ലക്ഷം വരെ തൊഴിലവസരം സൃഷ്ടിക്കും. പ്രൊഡക്ഷൻ ലിങ്ക്ഡ് ഇൻസെൻ്റീവ് (പിഎൽഐ) പദ്ധതി വഴി ഇന്ത്യയിൽ ഇതുവരെ 1.65 ലക്ഷം നേരിട്ടുള്ള തൊഴിലവസരങ്ങൾ സൃഷ്ടിച്ചതായാണ് കണക്ക്.
