ഹരിപ്പാട്; മണ്ണാർക്കാട് നാഗരാജ ക്ഷേത്രത്തിലെ പുതിയ പൂജാരിണി സാവിത്രി അന്തർജനം ചുമതല ഏറ്റെടുത്തു. മുഖ്യപൂജാരിണിയായിരുന്ന ഉമാദേവി അന്തർജ്ജനത്തിന്റെ വിയോഗത്തെ തുടർന്നാണ് സാവിത്രി അന്തർജനത്തിന് ഈ നിയോഗം ലഭിച്ചത്.
രാവിലെ 8 നും 9 നും മദ്ധ്യേയുള്ള ശുഭമുഹൂർത്തിൽ സാവിത്രി അന്തർജനം ക്ഷേത്ര ശ്രീകോവിലിൽ നാഗരാജാവിന്റെ പൂജകൾ ആരംഭിച്ചു. മണ്ണാറശാല ഇല്ലത്തെ എം.വി.സുബ്രഹ്മണ്യൻ നമ്പൂതിരിയുടെ ഭാര്യയാണ് 83 കാരിയായ സാവിത്രി അന്തർജനം. കോട്ടയം കാഞ്ഞിരക്കാട്ട് ഇല്ലത്ത് ശങ്കരൻ നമ്പൂതിരിയുടെയും ആര്യ അന്തർജ്ജനത്തിന്റെയും മകളാണ്.
കഴിഞ്ഞ വർഷം ഓഗസ്റ് 9 നാണ് ഉമാദേവി അന്തർജ്ജനം സമാധിയായത്. സമാധിയായ അമ്മയുടെ പാദതീർത്ഥം അഭിഷേകം ചെയ്താണ് സാവിത്രി അന്തർജ്ജനം മുഖ്യപൂജാരിണിയായി അവരോധിക്കപ്പെട്ടത്. ഇതേ തുടർന്നുള്ള സംവത്സരദീക്ഷ പൂർത്തിയായതോടെയാണ് ഇന്ന് ക്ഷേത്ര ശ്രീകോവിലിൽ അമ്മ നാഗരാജാവിന്റെ പൂജകൾ ആരംഭിച്ചത്.
ഉമാദേവി അന്തർജനത്തിന്റെ അന്ത്യകർമ്മങ്ങൾ നടന്നതിനൊപ്പം നിലവറയുടെ തെക്കേത്തളത്തിൽ പുതിയ അമ്മയുടെ സ്ഥാനാരോഹണവും നടന്നിരുന്നു. സംവത്സരദീക്ഷ പൂർത്തിയായ ശേഷം ശുഭകരമായ മുഹൂർത്തത്തിലായിരുന്നു പുതിയ അമ്മ ചുമതല ഏറ്റെടുത്തത്.
