ഇസ്ലാമാബാദ്: കാർഗിൽ യുദ്ധത്തിൽ പാകിസ്താൻ സൈന്യത്തിന്റെ പങ്ക് സമ്മതിച്ച് പാക് സൈനിക മേധാവി. ഇതാദ്യമായാണ് പാകിസ്താന്റെ ഉന്നത സൈനിക നേതൃത്വം ഇക്കാര്യം സമ്മതിക്കുന്നത്. മുജാഹിദ്ദീനുകൾ എന്ന് പാകിസ്താൻ വിളിക്കുന്ന കശ്മീരി തീവ്രവാദികളും ഇന്ത്യൻ സൈന്യവും തമ്മിലാണ് യുദ്ധമുണ്ടായത് എന്നായിരുന്നു പാകിസ്താന്റെ ഭാഷ്യം.
പ്രതിരോധ ദിനത്തിന്റെ ഭാഗമായി നടന്ന പരിപാടിയെ അഭിസംബോധന ചെയ്യവേയാണ് കാർഗിൽ ഉൾപ്പെടെയുളള യുദ്ധഭൂമികളിൽ നിരവധി സൈനികരെ പാകിസ്താന് നഷ്ടമായതായി സൈനിക മേധാവി ജനറൽ അസിം മുനീർ തുറന്നു സമ്മതിച്ചത്.
1999 ലാണ് കാർഗിൽ യുദ്ധം ഉണ്ടാകുന്നത്. രണ്ടര ദശാബ്ദമായെങ്കിലും ഇതുവരെ ഇതുമായി ബന്ധപ്പെട്ട പ്രസ്താവനകൾ പാക് സൈനിക നേതൃത്വം സൂക്ഷ്മതയോടെയാണ് കൈകാര്യം ചെയ്തിരുന്നത്. 1948 ലെയും 1965, 1971, 1999 ലെ കാർഗിൽ യുദ്ധങ്ങളിലും ആയിരക്കണക്കിന് സൈനികർ അവരുടെ ജീവൻ രാജ്യത്തിനും ഇസ്ലാമിനും വേണ്ടി സമർപ്പിച്ചുവെന്ന് ആയിരുന്നു ജനറൽ അസിം മുനീറിന്റെ വാക്കുകൾ.
ഭീകരരെ മറയാക്കി കാർഗിലിൽ ഇന്ത്യയുടെ ഭൂപ്രദേശം പിടിച്ചടക്കാനുളള പാക് സൈന്യത്തിന്റെ ശ്രമമായിരുന്നു നടന്നത്. ഇന്ത്യൻ സൈന്യം ചുട്ടമറുപടി കൊടുത്തതോടെ പാക് സൈന്യം പിൻമാറുകയായിരുന്നു. 59 ാമത് പ്രതിരോധ ദിനത്തിന്റെ ഭാഗമായി റാവൽപിണ്ടിയിലെ സൈനിക ആസ്ഥാനത്ത് നടന്ന ചടങ്ങിലായിരുന്നു ജനറൽ അസിം മുനീർ ഇക്കാര്യം സമ്മതിച്ചത്.
ദിവസങ്ങൾ നീണ്ടു നിന്ന യുദ്ധത്തിനൊടുവിൽ പാക് സൈന്യം കൈവശപ്പെടുത്തിയ തന്ത്രപ്രധാന മേഖലകളൊക്കെ ഭാരതസൈന്യം തിരിച്ചുപിടിച്ചു. 1999 ജൂലൈ 26 നാണ് യുദ്ധം അവസാനിച്ചത്.
