ഷുഗറിനെ പേടിക്കേണ്ട, കണ്ണുംപൂട്ടി കഴിക്കാം, ഡ്രൈ ഫ്രൂട്ട് ലഡ്ഡു ഉണ്ടാക്കിയാലോ.. റെസിപ്പി ഇതാ

ഇനിയങ്ങോട്ട് വരാനിരിക്കുന്നത് ആഘോഷ വേളകളാണ്. മധുരപലഹാരമില്ലാത്തൊരു ആഘോഷം ഇന്ത്യക്കാർക്ക് ചിന്തിക്കാൻ പോലും കഴിയില്ല. കല്യാണമായാലും ബർത്ത്‌ഡേ പാർട്ടി ആയാലും മറ്റെന്ത് ആഘോഷവേളകളിലും ഒഴിച്ചുകൂടനാവാത്ത പലഹാരമാണ് ലഡ്ഡു. എന്നാൽ പലരും ആരോഗ്യ സംരക്ഷണത്തിന്റെ ഭാഗമായി ലഡ്ഡു കഴിക്കാൻ മടിക്കുന്നവരാണ്. അത്തരക്കാർക്കായി ഒരു ഷുഗർഫ്രീ ഡ്രൈ ഫ്രൂട്ട് ലഡ്ഡു റെസിപ്പി പരിചയപ്പെടാം

ആവശ്യമായ ചേരുവകൾ

1 ടീസ്പൂൺ വെളിച്ചെണ്ണ, 1/2 കപ്പ് തേങ്ങാ, 1/3 കപ്പ് ഉണങ്ങിയ അത്തിപ്പഴം നുറുക്കിയത്, 1/3 കപ്പ് ചെറുതായി നുറുക്കിയ പിസ്ത, 1/3 കപ്പ് നുറുക്കിയ ബദാം, 1/3 കപ്പ് ചെറുതായി നുറുക്കിയ കശുവണ്ടി, 1/3 കപ്പ് വാൽനട്ട് നുറുക്കിയത്, 1/3 കപ്പ് ഉണക്കമുന്തിരി,1 കപ്പ് ഈത്തപ്പഴം, ഏലയ്‌ക്ക പൊടി

പാകം ചെയ്യുന്ന വിധം

ഒരു നോൺ-സ്റ്റിക്ക് പാനിൽ എണ്ണ ചൂടാക്കി, തേങ്ങ ചേർത്ത് 1 മിനിറ്റ് ഇടത്തരം തീയിൽ വഴറ്റുക. ശേഷം ഇതിനോടൊപ്പം അത്തിപ്പഴം, പിസ്ത, ബദാം, കശുവണ്ടി, വാൽനട്ട്, ഉണക്കമുന്തിരി, ഈന്തപ്പഴം എന്നിവ ചേർത്ത് 5 മുതൽ 6 മിനിറ്റ് വരെ വഴറ്റുക. ഇതിലേക്ക് ഏലയ്‌ക്ക പൊടി ചേർത്ത് നന്നായി ഇളക്കി യോജിപ്പിക്കണം. ഈ മിശ്രിതം ഒരു പരന്ന പാത്രത്തിലേക്ക് മാറ്റി 2 മിനിറ്റ് തണുക്കാനായി വയ്‌ക്കണം. ശേഷം കൈകളിൽ അല്പം എണ്ണ പുരട്ടിയ ശേഷം ഈ മിശ്രിതം ചെറിയ ഉരുളകളാക്കി മാറ്റണം. ലഡ്ഡു തയ്യാറായി കഴിഞ്ഞു. റഫ്രിജറേറ്ററിൽ എയർടൈറ്റ് കണ്ടെയ്നറിൽ സൂക്ഷിച്ചാൽ ഒരാഴ്ച വരെ കേടുകൂടാതെ ഉപയോഗിക്കാം.