ആക്ഷൻ ഡ്രാമയായ ജിഗ്രയുടെ റിലീസ് തിരക്കിലാണ് ബോളിവുഡ് താരസുന്ദരി ആലിയ ഭട്ട്. സിനിമയുടെ പ്രമോഷനുമായി ബന്ധപ്പെട്ട് അടുത്തിടെ താരം നൽകിയ അഭിമുഖമാണ് ഇപ്പോൾ ഏവരുടെയും ശ്രദ്ധയാകർഷിക്കുന്നത്. തന്റെ രോഗത്തെ കുറിച്ച് വെളിപ്പെടുത്തിയിരിക്കുകയാണ് ആലിയ ഭട്ട്.
തനിക്ക് ഹൈപ്പർ ആക്റ്റിവിറ്റി ഉണ്ടെന്നാണ് താരത്തിന്റെ വെളിപ്പെടുത്തൽ. അറ്റൻഷൻ ഡെഫിസിറ്റ് ഡിസോർഡർ എന്നാണ് ഇത് അറിയപ്പെടുന്നത്. രോഗം കൊണ്ട് തനിക്ക് മറ്റ് പ്രശ്‌നങ്ങളൊന്നുമില്ലെങ്കിലും ഒരു കാര്യത്തിനും വേണ്ടി അമിതമായി സമയം ചെലവഴിക്കാൻ തനിക്ക് താത്പര്യമില്ലെന്ന് താരം പറയുന്നു.
45 മിനിറ്റിൽ കൂടുതൽ മേയ്‌ക്കപ്പ് ചെയ്യാനായി ഇരിക്കാൻ തനിക്ക് താത്പര്യമില്ല. വിവാഹ ദിവസത്തിൽ മേയ്‌ക്കപ്പ് ആർട്ടിസ്റ്റായ പുനീത്, മേയ്‌ക്കപ്പ് ചെയ്യുന്നതിനായി തന്നോട് 2 മണിക്കൂർ സമയം ആവശ്യപ്പെട്ടിരുന്നു. എന്നാൽ തനിക്ക് ഈ രോഗമുള്ളതിനാൽ 2 മണിക്കൂർ മേയ്‌ക്കപ്പിനായി ചെലവഴിക്കാൻ സാധിച്ചില്ലെന്നും എല്ലാം വളരെ പെട്ടന്ന് ചെയ്യണമെന്ന് താൻ ആവശ്യപ്പെട്ടതായും ആലിയ പറഞ്ഞു. എല്ലാ കാര്യങ്ങളും പെട്ടന്ന് പൂർത്തീകരിക്കണം. ഒന്നിന് വേണ്ടിയും കൂടുതൽ സമയം ചെലഴിക്കുന്നത് ഇഷ്ടമല്ല. എല്ലാം വളരെ പെട്ടന്ന് നടക്കുന്നതിനോടാണ് താത്പര്യമെന്നും താരം വ്യക്തമാക്കി.
5 വർഷത്തെ പ്രണയത്തിനൊടുവിലാണ് ആലിയ, ബോളിവുഡ് സൂപ്പർ സ്റ്റാറായ രൺബീർ കപൂറിനെ വിവാഹം ചെയ്തത്. അടുത്ത ബന്ധുക്കളും സുഹൃത്തുക്കളും മാത്രമായിരുന്നു വിവാഹത്തിൽ പങ്കെടുത്തത്. ഹോളിവുഡ് സിനിമാ ലോകത്തേക്കും ആലിയ ചുവടുവയ്പ്പ് നടത്തിയിരുന്നു.
