തന്റെ കുടുംബത്തിന്റെ താങ്ങും തണലും ഭാര്യ രാധികയാണെന്ന് പല വേദികളിലും സുരേഷ് ഗോപി പറഞ്ഞിട്ടുണ്ട്. ഇപ്പോഴിതാ, രാധിക എന്ന സുരേഷ് ഗോപിയുടെ ഭാര്യയെപ്പറ്റി തങ്ങളുടെ അമ്മയെപ്പറ്റി മനസ്സുതുറക്കുകയാണ് മകൻ മാധവ് സുരേഷ്. വീട് നിലനിർത്താൻ വേണ്ടി എല്ലാം മാറ്റിവെച്ച വ്യക്തിയാണ് തന്റെ അമ്മയെന്നും കുടുംബത്തിനുവേണ്ടി അമ്മ ത്യാഗം ചെയ്യുകയാണ് എന്നും ഒരു ഓൺലൈൻ മാധ്യമത്തിന് നൽകിയ അഭിമുഖത്തിൽ മാധവ് സുരേഷ് പറഞ്ഞു.
“സുരേഷ് ഗോപി എന്ന നടന്റെയും രാഷ്ട്രീയക്കാരന്റെയും ഉത്തരവാദിത്വങ്ങൾ കാരണം കുടുംബത്തിനൊപ്പം അധികസമയം ചെലവിടാൻ അദ്ദേഹത്തിന് സാധിച്ചിട്ടില്ല. സ്വന്തം കാര്യത്തിന് വേണ്ടിയുള്ള സമയം പോലും നൽകിക്കൊണ്ട് ജീവിതകാലം മുഴുവൻ പ്രവർത്തിച്ച ആളാണ്. അങ്ങനെ ഒരാൾക്ക് സ്വന്തം മക്കളുടെ ഒപ്പം സമയം ചിലവിടാൻ സാധിക്കുന്നത് അപൂർവമാണ്. രണ്ടുമണിക്കൂർ ഒഴിവു കിട്ടിയാൽ വണ്ടിയോടിച്ച് വീട്ടിൽ വന്ന് ഞങ്ങളെ കണ്ടിട്ട് പോകുന്ന ആളാണ് അച്ഛൻ. ആ സമയം വീട് നിലനിർത്താൻ വേണ്ടി എല്ലാം മാറ്റിവെച്ച ഒരാൾ എന്റെ അമ്മയാണ്”.
“അമ്മയുമായിട്ടാണ് നാലുമക്കളും ഏറ്റവും കൂടുതൽ സമയം ചെലവഴിച്ചിട്ടുള്ളത്. അച്ഛനെ എത്ര അറിയാം എന്ന് ചോദിക്കുന്നതിനേക്കാളും അമ്മയെ എത്ര അറിയാം എന്ന് ചോദിച്ചാൽ എനിക്ക് ഒരുപാട് പറയാൻ ഉണ്ടാവും. മറ്റുള്ളവർക്ക് വേണ്ടി സ്വയം ത്യാഗം ചെയ്യുക. അമ്മ എല്ലാ കാര്യം കൊണ്ടും സ്വന്തം മക്കൾക്ക് വേണ്ടി ജീവിതം മാറ്റിവച്ച ഒരാളാണ്. അത് എല്ലാ രീതിയിലും. അച്ഛന്റെ സാന്നിധ്യം ഇല്ല എന്ന് ഞങ്ങൾക്ക് തോന്നാതിരിക്കാൻ എല്ലാം ചെയ്തിട്ടുണ്ട്. മക്കൾക്കു വേണ്ടിയാണെങ്കിലും അങ്ങനെയൊരു ത്യാഗം ഈയൊരു തലമുറയിൽ കാണാറില്ല. എല്ലാവരും അവരുടെ കാര്യം നേടാൻ വേണ്ടി നടക്കുന്ന സമയത്ത് ഞാൻ കണ്ടു വളർന്നത് എല്ലാം ത്യാഗം ചെയ്ത് മക്കൾക്ക് വേണ്ടിയും കുടുംബത്തിനുവേണ്ടിയും നിൽക്കുന്ന അമ്മയെയാണ്”- മാധവ് സുരേഷ് പറഞ്ഞു.
