മുംബൈ: ഭീകരാക്രമണ സാധ്യത സംബന്ധിച്ച് കേന്ദ്ര ഏജൻസികൾ മുന്നറിപ്പ് നൽകിയതിനെ തുടർന്ന് മുംബൈയിലെ വിവിധയിടങ്ങളിൽ സുരക്ഷ ശക്തമാക്കി പൊലീസ്. മുംബൈയിലെ ആരാധനാലയങ്ങളിലും മറ്റ് തിരക്കേറിയ സ്ഥലങ്ങളിലും സുരക്ഷ വർദ്ധിപ്പിച്ചിട്ടുണ്ടെന്ന് പൊലീസ് പറഞ്ഞു.
മതപരവും തിരക്കേറിയതുമായ സ്ഥലങ്ങളിൽ” മോക്ക് ഡ്രില്ലുകൾ” നടത്താനും ഉദ്യോഗസ്ഥർക്ക് നിർദേശം നൽകിയതായി അധികൃതർ അറിയിച്ചു. ഉദ്യോഗസ്ഥരുടെ അതാത് സോണുകളിൽ പ്രത്യേകം ശ്രദ്ധ ചെലുത്തണമെന്ന നിർദേശവുമുണ്ട്. ക്ഷേത്ര പരിസരങ്ങളിൽ കൂടുതൽ ജാഗ്രത പുലർത്തണമെന്നും അധികൃതർ നിർദേശം നൽകി.
മുംബൈയിലെ രണ്ട് ആരാധനാലയങ്ങളിൽ പൊലീസ് മോക്ക് ഡ്രിൽ നടത്തിയിരുന്നു. എന്നാൽ ഇത് ഉത്സവത്തിന് മുന്നോടിയായുള്ള സുരക്ഷാ പരീക്ഷണമാണെന്ന് പൊലീസ് പറഞ്ഞു. ദുർഗാ പൂജയ്ക്കും ദസറയ്ക്കും മുംബൈ നഗരം തയ്യാറെടുപ്പുകൾ നടത്തുന്നതിനിടെയാണ് ഭീകരാക്രമണ സാധ്യത മുന്നിൽ കണ്ട് അന്വേഷണ ഏജൻസികൾ മുന്നറിയിപ്പ് നൽകിയത്.
