അനുയോജ്യമായ വരനെ ലഭിക്കാത്തതിനെ തുടർന്ന് 2023ൽ ‘സ്വയം വിവാഹിതയായി’ സമൂഹമാദ്ധ്യമങ്ങളിൽ തരംഗം സൃഷ്ടിച്ച ഇവൻഫ്ളുവൻസർ ജീവനൊടുക്കി. ടിക് ടോക്കറും ഇസ്താംബൂൾ പൗരയുമായ കുബ്ര അയ്കുത് (26) ആണ് മരിച്ചത്.
ആംഡബര കെട്ടിടത്തിന്റെ അഞ്ചാം നിലയിൽ നിന്ന് കുബ്ര ചാടുകയായിരുന്നു. മൃതദേഹത്തിന് സമീപത്ത് നിന്നും ആത്മഹത്യാ കുറിപ്പ് കണ്ടെടുത്തതായി അധികൃതർ അറിയിച്ചു. സംഭവത്തിൽ അന്വേഷണം ആരംഭിച്ചതായും പൊലീസ് പറഞ്ഞു.
2023-ലാണ് തനിക്ക് അനുയോജ്യമായ വരനെ ലഭിക്കാത്തതിനെ തുടർന്ന് ‘ സ്വയം വിവാഹിത’യായെന്ന് കുബ്ര സമൂഹമാദ്ധ്യമങ്ങളിലൂടെ അറിയിച്ചത്. വിവാഹ വസ്ത്രം ധരിച്ച് പൂക്കളുമായി സന്തോഷത്തോടെ കാറിൽ വരുന്നതിന്റെയും ബർഗർ കഴിക്കുന്നതിന്റെയും വീഡിയോയും താരം പങ്കുവച്ചിരുന്നു. ഇതിന് പിന്നാലെ താരത്തെ വിമർശിച്ചും ആശംസിച്ചും നിരവധി പേർ രംഗത്തെത്തി.
ജീവനൊടുക്കുന്നതിന് ഏതാനും ദിവസങ്ങൾക്കും മുമ്പും കുബ്ര സമൂഹമാദ്ധ്യമങ്ങളിൽ സജീവമായിരുന്നെങ്കിലും തന്റെ വിഷമം ആരാധകരുമായി പങ്കുവച്ചിരുന്നു. ” ഞാൻ എന്റെ എല്ലാ ഊർജ്ജവും സംഭരിച്ചു. എന്നാൽ എനിക്ക് ഭാരം വയ്ക്കുന്നില്ല. ഓരോ ദിവസവും ഒരു കിലോഗ്രാം ഭാരം കുറയുകയാണ്. ഇനി എന്ത് ചെയ്യണമെന്ന് അറിയില്ല. എനിക്ക് പെട്ടന്ന് ഭാരം വയ്ക്കണം.”- കുബ്ര ഇൻസ്റ്റഗ്രാമിൽ കുറിച്ചു.
View this post on Instagram
ജീവനൊടുക്കുന്നതിന് മുമ്പായി തന്റെ അപ്പാർട്ട്മെന്റ് വൃത്തിയാക്കുന്നതിന്റെ വീഡിയോയും താരം ടിക് ടോക്കിൽ പങ്കുവച്ചിരുന്നു. ടിക് ടോക്കിൽ ഒരു മില്യണും, ഇൻസ്റ്റഗ്രാമിൽ രണ്ട് ലക്ഷവും ഫോളോവേഴ്സുള്ള താരമാണ് കുബ്ര.
