ടി20 പരമ്പരയിലെ ആദ്യ മത്സരത്തിൽ ബംഗ്ലാദേശിനെതിരെ വമ്പൻ ജയം സ്വന്തമാക്കി ഇന്ത്യ. ബംഗ്ലാദേശ് ഉയർത്തിയ 127 റൺസ് വിജയലക്ഷ്യം 47 പന്ത് ശേഷിക്കെ ഏഴ് വിക്കറ്റ് ബാക്കിയാക്കി ഇന്ത്യ മറികടന്നു. ഇന്ത്യക്കായി മായങ്ക് യാദവും നിതീഷ് കുമാർ റെഡ്ഡിയും അരങ്ങേറി. കരിയറിലെ ആദ്യ ഓവർ മെയ്ഡൻ എറിഞ്ഞാണ് മായങ്ക് തുടക്കമിട്ടത്.
ബംഗ്ലാദേശിന്റെ കുഞ്ഞൻ വിജയലക്ഷ്യം പിന്തുടർ ഇന്ത്യക്കായി സഞ്ജു-അഭിഷേക് സഖ്യം മികച്ച തുടക്കമാണ് നൽകിയത്. ഇരുവരും ചേർന്ന് രണ്ടോവറിൽ നേടിയത് 25 റൺസ്. 7 പന്തിൽ 16 റൺസെടുത്ത മിന്നും ഫോമിലായിരുന്ന അഭിഷേക് റണ്ണൗട്ടാവുകയായിരുന്നു. പിന്നാലെ ക്രീസിലെത്തിയ ക്യാപ്റ്റൻ സൂര്യകുമാർ 14 പന്തിൽ 29 റൺസുമായി സ്കോറിംഗിന്റെ വേഗം ഡബിളാക്കി. ആറാം ഓവറിൽ താരം പുറത്താകുമ്പോൾ സ്കോർ 65-ൽ എത്തിയിരുന്നു. മുസതാഫിസൂർ റഹ്മാനായിരുന്നു വിക്കറ്റ്. പിന്നാലെ സഞ്ജു സാംസണും വീണു. 19 പന്തിൽ ആറ് ബൗണ്ടറിയടക്കം 29 റൺസെടുത്ത താരത്തെ മെഹിദി ഹസന്‍ പുറത്താക്കി. ഇരുവരും ചേർന്ന് 40 റൺസാണ് ചേർത്തത്.
ശേഷം ക്രീസിൽ ഒന്നിച്ച ഹാർദിക് പാണ്ഡ്യയും ( 16 പന്തിൽ 39 ) നിതീഷ് കുമാർ റെഡ്ഡിയും ചേർന്ന് ഇന്ത്യയെ അനായാസം ജയത്തിലേക്ക് നയിക്കുകയായിരുന്നു. നേരത്തെ ടോസ് നേടിയ ഇന്ത്യ ബംഗ്ലാദേശിനെ ബാറ്റിംഗിന് വിടുകയായിരുന്നു. 35* റൺസ് നേടിയ മെഹിദി ഹസന്‍ മിറാസ് ആണ് അവരുടെ ടോപ് സ്കോറർ. നജ്മുൾ ഹാെസൈൻ ഷാൻ്റോ 27 റൺസെടുത്തു. ആറുപേർ രണ്ടക്കം കാണാതെ പുറത്തായി. 19.5 ഓവറിൽ 127 റൺസിന് ബംഗ്ലാദേശിൻ്റ ഇന്നിംഗ്സ് അവസാനിച്ചു. അർഷദീപ് സിംഗ്, വരുൺ ചക്രവർത്തി എന്നിവർ മൂന്നു വീതം വിക്കറ്റ് നേടി. ഹാർദിക് പാണ്ഡ്യ, മായങ്ക് യാദവ്, വാഷിംഗ്ടൺ സുന്ദർ എന്നിവർ ഓരോ വിക്കറ്റ് വീതം വീഴ്‌ത്തി.
