ഷാർജ: ഷാർജയിൽ ലഹരി മരുന്ന് കടത്തിയ ആറ് പേർ അറസ്റ്റിൽ. എ ഫോർ പേപ്പറുകൾ ലഹരിയിൽ മുക്കി അത് ബണ്ടിലുകളായി കടത്തുകയായിരുന്നു ഇവരുടെ രീതി. ലഹരിയിൽ മുക്കിയ നാല് കിലോ എ ഫോർ പേപ്പറുകളടക്കം ഇവരിൽ നിന്ന് പിടിച്ചെടുത്തു.
ഷാർജ പൊലീസിന്റെ ആന്റി നർക്കോട്ടിക് വിഭാഗമാണ് ഇവരെ പിടികൂടിയത്. പിടിയിലായ ആറുപേരും ഏഷ്യൻ രാജ്യങ്ങളിൽ നിന്നുള്ളവരാണ്. രഹസ്യവിവരത്തെ തുടർന്ന് നടത്തിയ പരിശോധനയിലാണ് സംഘം പിടിയിലായത്.
പ്രധാന പ്രതിയെന്ന് സംശയിക്കുന്നയാളെ നിരന്തരം പിന്തുടർന്ന് കൂട്ടാളികളെ കണ്ടെത്തുകയായിരുന്നു. പ്രതികളിൽ ഒരാളുടെ താമസസ്ഥലത്ത് നിന്നാണ് ലഹരി കണ്ടെത്തിയത്.
