മുംബൈ: പുതുതായി ഉദ്ഘാടനം ചെയ്യപ്പെട്ട മുംബൈയിലെ ഭൂഗർഭ മെട്രോ ലൈനിൽ ചൊവ്വാഴ്ച മാത്രം യാത്ര ചെയ്തത് 20,482 പേരെന്ന് റിപ്പോർട്ട്. പ്രവർത്തനമാരംഭിച്ച രണ്ടാം ദിനമാണ് ഇത്രയധികം പേർ യാത്ര ചെയ്തിരിക്കുന്നത്. ചൊവ്വാഴ്ച രാവിലെ ആറര മുതൽ രാത്രി ഒമ്പത് മണി വരെയുള്ള കണക്കാണിത്.
മുംബൈ മെട്രോ ലൈൻ-3 അഥവാ അക്വാ ലൈനിന്റെ 12.69 കിലോമീറ്റർ ദൈർഘ്യമുള്ള ഫേസ്-1 ഭാഗം കഴിഞ്ഞ ദിവസം പ്രധാനമന്ത്രി നരേന്ദ്രമോദി നാടിന് സമർപ്പിച്ചിരുന്നു. ബാന്ദ്ര കുർള കോംപ്ലക്സ് (BKC) മുതൽ ആരേയ് കോളനി വരെ നീളുന്നതാണ് യാത്ര. ഇന്ത്യയിലെ തന്നെ ഏറ്റവും ആഡംബരപൂർണമായ വ്യാപാരജില്ലയാണ് BKC. ഫേസ് -1 യാഥാർത്ഥ്യമായതോടെ 6.5 ലക്ഷം വാഹനട്രിപ്പുകൾ ഇതുവഴി ഒഴിവാക്കാൻ സാധിക്കുമെന്ന് മുംബൈ മെട്രോ റെയിൽ കോർപ്പറേഷൻ അറിയിച്ചു. കൂടാതെ റോഡിലെ ട്രാഫിക് 35 ശതമാനം കുറയുകയും ചെയ്യും.
തിങ്കൾ മുതൽ ശനി വരെ രാവിലെ 6.30 മുതൽ രാത്രി 10.30 വരെയാണ് മുംബൈ മെട്രോ – 3 ലൈൻ പ്രവർത്തിക്കുക. ഞായറാഴ്ച ദിവസങ്ങളിൽ രാവിലെ എട്ടര മുതൽ രാത്രി 10.30 വരെയാണ് സർവീസ്. പൂർണമായും മേക്ക് ഇൻ ഇന്ത്യ പദ്ധതിപ്രകാരം നിർമിച്ചതാണ് മുംബൈ മെട്രോ-3. അത്യാധുനിക സൗകര്യങ്ങളടങ്ങിയ മെട്രോ സർവീസാണിത്. എട്ട് കോച്ചുകൾ ഇതിലുണ്ട്. ഒരേസമയം 2,500 യാത്രക്കാരെ വഹിക്കാനാകും.
