ന്യൂഡൽഹി: വികസിത ഇന്ത്യ എന്ന ലക്ഷ്യം കൈവരിക്കാൻ രാജ്യത്ത് ഒരേസമയം ലോക്സഭാ-നിയമസഭാ തിരഞ്ഞെടുപ്പുകൾ നടത്തേണ്ടത് അനിവാര്യമാണെന്ന് കേന്ദ്ര കൃഷിമന്ത്രി ശിവരാജ് സിംഗ് ചൗഹാൻ. പറഞ്ഞു. ഹരിദ്വാറിൽ സന്യാസിമാരെയും മതനേതാക്കളെയും പങ്കെടുപ്പിച്ച് നടന്ന പരിപാടിയിലായിരുന്നു ചൗഹാന്റെ പ്രതികരണം.
ഇടയ്ക്കിടെയുള്ള തിരഞ്ഞെടുപ്പുകൾ രാജ്യത്തിന്റെ വികസനപ്രവർത്തനങ്ങൾക്ക് തടസ്സമാകുന്നുവെന്ന് അദ്ദേഹം പറഞ്ഞു. ലോക്സഭയിലേക്കും നിയമസഭകളിലേക്കും ഒരേസമയം തിരഞ്ഞെടുപ്പ് നടത്തുന്നത് സമയവും പണവും ഭരണസംവിധാനത്തിന്റെ വിഭവങ്ങളും ലാഭിക്കാൻ സഹായിക്കും. ഇതുവഴി വികസനപ്രവർത്തനങ്ങളിൽ കൂടുതൽ ശ്രദ്ധ കേന്ദ്രീകരിക്കാനാകുമെന്നും അദ്ദേഹം പറഞ്ഞു.
‘രാജ്യത്തിന്റെ താൽപര്യമാണ് ലക്ഷ്യം’
‘ഒരു രാജ്യം, ഒരു തിരഞ്ഞെടുപ്പ്’ എന്നത് ഏതെങ്കിലും രാഷ്ട്രീയ പാർട്ടിയുടെ താൽപര്യത്തിനുവേണ്ടിയുള്ള ആശയമല്ലെന്നും രാജ്യതാൽപര്യമാണ് ഇതിന് പിന്നിലെന്നും ശിവരാജ് സിംഗ് ചൗഹാൻ വ്യക്തമാക്കി.
രാജ്യം മുന്നോട്ടുപോയാൽ രാഷ്ട്രീയ പാർട്ടികൾക്കും മുന്നേറാനാകുമെന്നും അദ്ദേഹം പറഞ്ഞു. ‘ഒരു രാജ്യം, ഒരു തിരഞ്ഞെടുപ്പ്’ എന്ന ആശയത്തെക്കുറിച്ച് ജനങ്ങളിൽ കൂടുതൽ അവബോധം സൃഷ്ടിക്കണമെന്നും സന്യാസിമാരോട് ചൗഹാൻ അഭ്യർത്ഥിച്ചു.
2029-ൽ നടപ്പാക്കുമോ?
2029-ൽ തന്നെ ചില സംസ്ഥാനങ്ങളിലും കേന്ദ്രഭരണ പ്രദേശങ്ങളിലും ലോക്സഭാ-നിയമസഭാ തിരഞ്ഞെടുപ്പുകൾ ഒരുമിച്ച് നടത്താനുള്ള സാധ്യതയെക്കുറിച്ചും ചർച്ചകൾ സജീവമാണ്. നിലവിലെ നിയമനിർമാണ നടപടികൾ പ്രകാരം ‘ഒരു രാജ്യം, ഒരു തിരഞ്ഞെടുപ്പ്’ സംവിധാനം ആദ്യമായി നടപ്പാക്കാൻ 2034 ആണ് ലക്ഷ്യമിടുന്നതെന്നാണ് റിപ്പോർട്ടുകൾ.
ഇതിനായി പാർലമെന്റിന്റെ സംയുക്ത സമിതി ഭരണഘടനാ ഭേദഗതി ബിൽ പരിശോധിച്ചുവരികയാണ്. ലോക്സഭയിലേക്കും സംസ്ഥാന നിയമസഭകളിലേക്കും ഒരേസമയം തിരഞ്ഞെടുപ്പ് നടത്തുന്നതുമായി ബന്ധപ്പെട്ട നിർദേശങ്ങളിൽ സമിതി വിവിധ തലങ്ങളിൽ നിന്ന് അഭിപ്രായങ്ങൾ തേടുന്നുണ്ട്.
തിരഞ്ഞെടുപ്പ് കമ്മീഷനും സജ്ജം
ഒരേസമയം തിരഞ്ഞെടുപ്പ് നടത്തുന്നതിനായി ആറ് മാസം മുൻപ് അറിയിപ്പ് ലഭിച്ചാൽ തിരഞ്ഞെടുപ്പ് കമ്മീഷൻ തയ്യാറാകുമെന്നാണ് സംയുക്ത പാർലമെന്ററി സമിതിക്ക് നൽകിയ പ്രാഥമിക അഭിപ്രായത്തിൽ വ്യക്തമാക്കിയിരുന്നത്. ലോക്സഭ, നിയമസഭാ തിരഞ്ഞെടുപ്പുകൾക്കൊപ്പം തദ്ദേശ സ്ഥാപനങ്ങളിലേക്കുള്ള തിരഞ്ഞെടുപ്പുകളും ഏകീകരിക്കുന്നതിനെക്കുറിച്ചും ചർച്ചകൾ നടക്കുന്നുണ്ട്.
