തിരുവനന്തപുരം: രഞ്ജി ട്രോഫി ക്രിക്കറ്റില് ഈ സീസണിലെ കേരളത്തിന്റെ ആദ്യ മത്സരം വെള്ളിയാഴ്ച തലസ്ഥാനത്ത് ആരംഭിക്കും. പഞ്ചാബ് ആണ് എതിരാളി. തുമ്പ സെന്റ് സേവിയേഴ്സ് കോളജ് ഗ്രൗണ്ടിൽ വെള്ളി മുതല് തിങ്കള് വരെയാണ് മത്സരം. കേരളത്തെ നയിക്കുന്നത് സച്ചിന് ബേബിയാണ്. ദേശീയ ടീമിനൊപ്പമായതിനാല് സഞ്ജു സാംസനെ നിലവില് രഞ്ജി ടീമില് ഉള്പ്പെടുത്തിയിട്ടില്ല.
സച്ചിന് ബേബിയും രോഹന് കുന്നുമ്മലും,വിഷ്ണു വിനോദും, മൊഹമ്മദ് അസറുദ്ദീനും അണിനിരക്കുന്ന ബാറ്റിങ് നിര ശക്തമാണ്. ഇവരോടൊപ്പം മറുനാടന് താരങ്ങളായ ബാബ അപരാജിത്തും, ജലജ് സക്സേനയും ചേരും. ഓള്റൗണ്ടര് ആദിത്യ സര്വാതെയാണ് മറ്റൊരു മറുനാടന് താരം. ബേസില് തമ്പി, കെ.എം. ആസിഫ് തുടങ്ങിയവര് അണി നിരക്കുന്ന ബൗളിംഗും ചേരുമ്പോള് മികച്ച ടീമാണ് ഇത്തവണ കേരളത്തിന്റേത്.
കഴിഞ്ഞ സീസണില് ബംഗാളിന് എതിരെ മാത്രമായിരുന്നു കേരളത്തിന് ജയിക്കാനായത്. ഇത്തവണ കൂടുതല് മെച്ചപ്പെട്ട പ്രകടനം ലക്ഷ്യമിടുന്ന ടീമിനെ സംബന്ധിച്ച് ബാറ്റിങ് നിരയുടെ പ്രകടനം തന്നെയാകും കൂടുതല് നിര്ണായകമാവുക. കാരണം രഞ്ജിയില് ആദ്യ ഇന്നിംഗ്സ് ലീഡാണ് പലപ്പോഴും പോയിന്റ് പട്ടികയിലെ സ്ഥാനം നിശ്ചയിക്കുക.ഇന്ത്യന് മുന് താരം അമയ് ഖുറേസിയ ആണ് ഇത്തവണ ടീമിന്റെ പരിശീലകന്.
ഈ സീസണില് കേരളത്തിന്റെ നാല് മത്സരങ്ങള്ക്കാണ് കേരളം വേദിയാവുക.പഞ്ചാബിന് പുറമെ ഉത്തര്പ്രദേശ്, മധ്യപ്രദേശ്, ബിഹാര് ടീമുകളാണ് മത്സരങ്ങള്ക്കായി തിരുവനന്തപുരത്തെത്തുക. ആദ്യ മത്സരത്തിലെ എതിരാളികളായ പഞ്ചാബ് കഴിഞ്ഞ സീസണിലെ സയ്യദ് മുഷ്താഖ് അലി ടൂര്ണമെന്റിലെ ജേതാക്കളാണ്. ശുഭ്മാന് ഗില്, അഭിഷേക് ശര്മ്മ, അര്ഷദീപ് സിംഗ് എന്നിവരില്ലെങ്കിലും താര സമ്പന്നമാണ് ഇത്തവണത്തെ പഞ്ചാബ് ടീം. ഐപിഎല്ലിലൂടെ ശ്രദ്ധേയരായ പ്രഭ്സിമ്രാന് സിങ്, അന്മോല്പ്രീത് സിംഗ്, സിദ്ദാര്ഥ് കൗള് തുടങ്ങിയവര് ടീമിലുണ്ട്. വസിം ജാഫറാണ് ടീമിന്റെ പരിശീലകന്.
ഉത്തര്പ്രദേശ് ടീമില് നിതീഷ് റാണ, യഷ് ദയാല് തുടങ്ങിയ താരങ്ങളും മധ്യപ്രദേശിൽ രജത് പട്ടീദാര്, വെങ്കിടേഷ് അയ്യര്, അവേഷ് ഖാന് തുടങ്ങിയവരും ഉണ്ട്. ഇവരുടെയൊക്കെ പ്രകടനം കാണാനുള്ള അവസരം കൂടിയാകും കേരളത്തിലെ ക്രിക്കറ്റ് പ്രേമികള്ക്ക് തിരുവനന്തപുരത്തെ മത്സരങ്ങള്.കാലാവസ്ഥ അടക്കമുള്ള കാര്യങ്ങള് പരിഗണിച്ച് രണ്ട് ഘട്ടങ്ങളായാണ് ഇത്തവണത്തെ രഞ്ജി മല്സരങ്ങള്. ആദ്യ ഘട്ടം ഒക്ടോബര് 11 മുതല് നവംബര് 13 വരെയാണ്. ജനുവരി 23നാണ് രണ്ടാം ഘട്ടം തുടങ്ങുക. നവംബര് ആറ് മുതല് ഒന്പത് വരെയാണ് ഉത്തര്പ്രദേശുമായുള്ള കേരളത്തിന്റെ മത്സരം. മധ്യപ്രദേശുമായുള്ള മത്സരം ജനുവരി 23നും ബിഹാറുമായുള്ള മത്സരം ജനുവരി 30നും ആരംഭിക്കും.
