ആലപ്പുഴ: പുന്നമടക്കായലിൽ ഹൗസ് ബോട്ടിൽ നിന്ന് വീണ് യുവാവ് മരിച്ചു. കോട്ടയം കോതനല്ലൂർ സ്വദേശി രാജീവ് രാഘവൻ (42) ആണ് മരിച്ചത്. സുഹൃത്തുക്കൾ അടങ്ങിയ 12 അംഗ സംഘത്തോടൊപ്പം എത്തിയതാണ് രാജീവ് രാഘവൻ.
ഇന്നലെ രാത്രി രാജീവ്, ബോട്ടിൽ കിടന്നുറങ്ങിയത് കണ്ടിരുന്നുവെന്ന് സുഹൃത്തുക്കൾ പറഞ്ഞു. രാവിലെ മുതലാണ് ഇയാളെ കാണാതായത്. ഇതോടെ നാട്ടുകാരെയും ഫയർഫോഴ്സിനെയും വിവരം അറിയിച്ചു.
തുടർന്ന് നടത്തിയ തെരച്ചിലിൽ മറ്റൊരു ബോട്ടിന്റെ അടിയിൽ കുടുങ്ങിയ നിലയിൽ മൃതദേഹം കണ്ടെത്തുകയായിരുന്നു. രാജീവ് എങ്ങനെയാണ് കായലിലേക്ക് വീണതെന്ന് വ്യക്തമല്ല. മൃതദേഹം ആശുപത്രിയിലേക്ക് മാറ്റിയതായി പൊലീസ് അറിയിച്ചു.
