ചെന്നൈ: ഒക്ടോബർ 15-16 തീയതികളിൽ ആരംഭിക്കാൻ സാധ്യതയുള്ള വടക്കുകിഴക്കൻ മൺസൂണിൽ ഈ വർഷം തമിഴ്നാട്ടിൽ സാധാരണയിൽ കൂടുതൽ മഴ ലഭിക്കാൻ സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു.14.10.2024 മുതൽ 17.10.2024 വരെ തമിഴ്നാടിന്റെ തീരപ്രദേശങ്ങളിലും വടക്കൻ ജില്ലകളിലും കനത്തതോ അതിശക്തമായതോ ആയ മഴയ്ക്ക് സാധ്യതയുണ്ടെന്ന് ഇന്ത്യൻ കാലാവസ്ഥാ വകുപ്പ് പ്രവചനത്തിൽ അറിയിച്ചു.
തെക്കുകിഴക്കൻ ബംഗാൾ ഉൾക്കടലിൽ ഇന്ന് രാവിലെ ന്യൂനമർദം രൂപപ്പെട്ട് മേഖലയിൽ തുടരുകയാണ്. ഈ ന്യൂനമർദ്ദം ശക്തിപ്പെടുകയും പടിഞ്ഞാറ്-വടക്കുപടിഞ്ഞാറ് ദിശയിൽ നീങ്ങുകയും പുതുച്ചേരി വടക്കൻ തമിഴ്നാട്, തെക്കൻ ആന്ധ്രാപ്രദേശ് എന്നിവിടങ്ങളിൽ നിലയുറപ്പിക്കുകയും ചെയ്യും.
അറബിക്കടലിൽ രൂപം കൊണ്ട ന്യൂനമർദം ഇന്നലെ ശക്തി പ്രാപിച്ച് ഒമാൻ തീരത്തേക്ക് നീങ്ങുകയാണ്. ഇതുമൂലം തമിഴ്നാട്ടിലും പുതുച്ചേരിയിലും കാരയ്ക്കലിലും 5 ദിവസത്തേക്ക് മഴ തുടരും.ദക്ഷിണ മേഖലാ കാലാവസ്ഥാ നിരീക്ഷണ കേന്ദ്രം മേധാവി ബാലചന്ദ്രൻ ചെന്നൈയിൽ മാധ്യമപ്രവർത്തകരെ അറിയിച്ചതാണിത്.
വടക്ക് കിഴക്കൻ മൺസൂൺ: ചെന്നൈയിലെയും സമീപ ജില്ലകളിലെയും സ്കൂളുകൾക്കും കോളേജുകൾക്കും 15.10.2024 ന് അവധി പ്രഖ്യാപിച്ചു. ചെന്നൈ, ചെങ്കൽപേട്ട്, കാഞ്ചീപുരം,തിരുവള്ളൂർ ജില്ലകളിലെ സ്കൂളുകൾക്കും കോളേജുകൾക്കും തിങ്കളാഴ്ച അവധി പ്രഖ്യാപിച്ച് മുഖ്യമന്ത്രി എംകെ സ്റ്റാലിൻ ഉത്തരവിറക്കി.ചെന്നൈയിലും സമീപ ജില്ലകളിലും അടുത്ത രണ്ട് ദിവസങ്ങളിൽ അതിശക്തമായ മഴ പെയ്യുമെന്ന് പ്രാദേശിക കാലാവസ്ഥാ നിരീക്ഷണ കേന്ദ്രം (ആർഎംസി) പ്രവചിച്ച സാഹചര്യത്തിലാണ് അവധി പ്രഖ്യാപിച്ചത്. ഒക്ടോബർ 15 മുതൽ 18 വരെ ഈ ജില്ലകളിലെ ഐടി കമ്പനികളിലെ ജീവനക്കാർക്ക് വീട്ടിലിരുന്ന് ജോലി ചെയ്യാൻ അനുവദിക്കുന്നതിനുള്ള ഉപദേശം നൽകാനും മുഖ്യമന്ത്രി അധികാരികൾക്ക് നിർദ്ദേശം നൽകി.
അതിശക്തമായ മഴയ്ക്ക് സാധ്യതയുള്ളതിനാൽ ഇടിമിന്നൽ ഉള്ള സമയങ്ങളിൽ അടിയന്തര മുൻകരുതലുകൾ സ്വീകരിക്കാൻ ഗ്രേറ്റർ ചെന്നൈ കോർപ്പറേഷൻ (ജിസിസി) പ്രദേശവാസികളോട് അഭ്യർത്ഥിച്ചു.
