ഐക്കണിക് ക്ലാസിക് സീരീസിന്റെ 1:3 സ്കെയിൽ മോഡലുകളുടെ ഒരു പുതിയ ശ്രേണി പുറത്തിറക്കി റോയൽ എൻഫീൽഡ്. ഏഴ് നിറങ്ങളിലാണ് ഇത് നിർമ്മിച്ചിരിക്കുന്നത്. ക്രോം ബ്ലാക്ക്, മെറൂൺ ക്രോം, ഫോറസ്റ്റ് ഗ്രീൻ ക്രോം, ടീൽ ഗ്രീൻ, ബാറ്റിൽ ഗ്രീൻ, ഗൺ ഗ്രേ, ജെറ്റ് ബ്ലാക്ക് എന്നിവയാണ് നിറങ്ങൾ. ഓരോ സ്കെയിൽ മോഡലും പൂർണ്ണ വലിപ്പത്തിലുള്ള മോട്ടോർസൈക്കിളിനോട് സാമ്യമുള്ള 964 ഘടകങ്ങൾ ഉപയോഗിച്ചാണ് പണിതീർത്തിരിക്കുന്നത്.
ഈ 1:3 സ്കെയിൽ മോഡലുകൾക്ക് ഒരെണ്ണത്തിന് വില 94,990 ആണ്. ഓരോ മോഡലിനും 8.5 കിലോഗ്രാം ഭാരമുണ്ട്. വൃത്താകൃതിയിലുള്ള ഹെഡ്ലൈറ്റ്, സ്പോക്ക് വീലുകൾ, യഥാർത്ഥ മോട്ടോർസൈക്കിളിന് ഉപയോഗിക്കുന്ന മെറ്റീരിയലുകൾ എന്നിവ ഫീച്ചർ ചെയ്തുകൊണ്ടാണ് ക്ലാസിക്കിന്റെ രൂപത്തിൽ ഈ കരകൗശല ബൈക്ക് നിർമ്മിച്ചിരിക്കുന്നത്.
780 എംഎം നീളം, 380 എംഎം വീതി, 261 എംഎം ഉയരമുണ്ട് ഈ കുഞ്ഞൻ മോട്ടോർസൈക്കിളിന്. താൽപ്പര്യമുള്ള ഉപഭോക്താക്കൾക്ക് ബ്രാൻഡിന്റെ ഔദ്യോഗിക വെബ്സൈറ്റ് സന്ദർശിച്ച് ഇഷ്ടപ്പെട്ട നിറം തിരഞ്ഞെടുക്കാം. ലിമിറ്റഡ് എഡിഷൻ ക്ലാസിക് സ്കെയിൽ മോഡലുകൾ റോയൽ എൻഫീൽഡിന്റെ ഔദ്യോഗിക വെബ്സൈറ്റിൽ ഓൺലൈനായി വാങ്ങാവുന്നതാണ്.
