കൊച്ചി: ഭാരതത്തിലെ ഏറ്റവും മികച്ച സമ്മാനത്തുകയുള്ള ഹ്രസ്വചിത്ര മേളകളിലൊന്നായ ‘അരവിന്ദം നാഷണൽ ഷോർട്ട് ഫിലിം ഫെസ്റ്റിവൽ’ പോസ്റ്റർ പ്രകാശനം സംവിധായകൻ ഷാജി കൈലാസ് നിർവ്വഹിച്ചു. 2025 മാർച്ച് 14, 15, 16 തീയതികളിൽ കോട്ടയത്ത് വച്ചാണ് ദേശീയ ഷോർട്ട്ഫിലിം ഫെസ്റ്റിവൽ നടക്കുന്നത്. തമ്പ് ഫിലിം സൊസൈറ്റിയുടെ ആഭിമുഖ്യത്തിലാണ് ഫിലിം ഫെസ്റ്റിവൽ സംഘടിപ്പിക്കുന്നത്. പ്രമുഖ സിനിമാ സംവിധായകനായ ജി. അരവിന്ദന്റെ ഓർമ്മയ്‌ക്കായാണ് ഫെസ്റ്റിവലിന് ‘അരവിന്ദം’ എന്നു പേര് നൽകിയത്.
ഒരു ലക്ഷം രൂപ വീതം സമ്മാനത്തുകയും മെമന്റോയും ഉള്ള പൊതു വിഭാഗമായും അര ലക്ഷം വീതം സമ്മാനത്തുകയുള്ള ക്യാമ്പസ് വിഭാഗമായും, രണ്ട് വിഭാഗങ്ങളായാണ് പുരസ്കാരങ്ങൾ. മികച്ച ചിത്രം, മികച്ച നടൻ, മികച്ച നടി, സംവിധായകൻ, സിനിമാറ്റോഗ്രഫി, തിരക്കഥ, എന്നിവയ്‌ക്ക് പൊതുവിഭാഗത്തിലും കാമ്പസ് വിഭാഗത്തിലും പുരസ്കാരങ്ങൾ നൽകും. അരവിന്ദം ഷോർട്ട് ഫിലിം ഫെസ്റ്റിവലിൽ പ്രദർശനത്തിന് തെരഞ്ഞെടുക്കപ്പെട്ട ചിത്രങ്ങൾക്ക് പതിനായിരം രൂപ ക്യാഷ് അവാർഡും മൊമന്റോയും നൽകും.
2024 ജനുവരി 1 മുതൽ ഡിസംബർ 30 വരെയുള്ള കാലയളവിൽ പൂർത്തീകരിച്ചതോ റിലീസ് ചെയ്തതോ ആയ 30 മിനിട്ടിൽ താഴെയുള്ള ഷോർട്ട് ഫിലിമുകൾ ആണ് പരിണിക്കുക.
കൊച്ചിയിൽ നടന്ന പരിപാടിയിൽ തമ്പ് ഫിലിം സൊസൈറ്റി ഭാരവാഹികളായ ആർ.സാനു, ഷിജു ഏബ്രഹാം, ജയകുമാർ മൂലേടം, മനു മറ്റക്കര, അനിരുദ്ധ് ഏഴാച്ചേരി, ബിബിരാജ്, രമേശ് ലക്ഷ്മൺ തുടങ്ങിയവർ പങ്കെടുത്തു. നവംബർ 1 മുതൽ ഫിലിം ഫ്രീ വേ.കോം (filmfreeway.com) എന്ന വെബ് സൈറ്റിൽ എൻട്രികൾ സമർപ്പിക്കാവുന്നതാണെന്ന് സംഘാടകർ അറിയിച്ചു. കൂടുതൽ വിവരങ്ങൾക്ക് 7012864173 എന്ന നമ്പറിൽ വാട്സാപ്പ് ചെയ്യാം.
