തിരുവനന്തപുരം: മാളികപ്പുറം തിരക്കഥാകൃത്ത് അഭിലാഷ് പിളളയുടെ തിരക്കഥയിൽ ഒരുങ്ങുന്ന ആനന്ദ് ശ്രീബാല നവംബർ 15 ന് റിലീസ് ചെയ്യും. അണിയറ പ്രവർത്തകരാണ് റിലീസ് തീയതി പ്രഖ്യാപിച്ചത്. മാളികപ്പുറം സിനിമയുടെ വൻ വിജയത്തോടെ മലയാളത്തിലെ കാമ്പുളള തിരക്കഥാകൃത്തുക്കളിലൊരാളായി അഭിലാഷ് പിളള മാറിയിരുന്നു. അതുകൊണ്ടു തന്നെ ആനന്ദ് ശ്രീബാലയും പ്രേക്ഷകർ വളരെ പ്രതീക്ഷയോടെയാണ് നോക്കിക്കാണുന്നത്.
വിനയന്റെ മകൻ വിഷ്ണു വിനയ് ആണ് സംവിധാനം നിർവ്വഹിച്ചിരിക്കുന്നതെന്ന പ്രത്യേകതയും ഉണ്ട്. കൗണ്ട് ഡൗൺ ആരംഭിച്ചുവെന്ന് പറഞ്ഞാണ് വിഷ്ണു വിനയ് റിലീസ് തീയതി സോഷ്യൽ മീഡിയയിൽ പങ്കുവച്ചത്. ഉത്തരം കിട്ടാത്ത ആ ചോദ്യത്തിന് ഉത്തരം തേടി അനന്ദും ശ്രീബാലയും എത്തുന്നുവെന്ന് അഭിലാഷ് പിളളയും കുറിച്ചു. ത്രില്ലർ വിഭാഗത്തിൽപ്പെടുന്ന സിനിമയാണ് ആനന്ദ് ശ്രീബാല. ചിത്രത്തിന്റെ ടീസറും പോസ്റ്ററുകളും ഏറെ ശ്രദ്ധിക്കപ്പെട്ടിരുന്നു.
അർജുൻ അശോകനാണ് നായകൻ. അർജുന്റെ കരിയറിലെ വേറിട്ട വേഷമാകും ഇതെന്നാണ് ടീസർ നൽകുന്ന സൂചന. അപർണ്ണ ദാസ്, ധ്യാൻ ശ്രീനിവാസൻ, സൈജു കുറുപ്പ്, സിദ്ദിഖ്, അജു വർഗീസ്, ആശ ശരത്, ഇന്ദ്രൻസ്, മനോജ് കെ.യു, മാളവിക മനോജ് തുടങ്ങിയവരും ചിത്രത്തിലുണ്ട്. മാളികപ്പുറത്തിന് ഹിറ്റ് ഗാനങ്ങൾ ഒരുക്കിയ രഞ്ജിൻ രാജ് ആണ് ആനന്ദ് ശ്രീബാലയ്ക്കും സംഗീതമൊരുക്കുന്നത്. വിഷ്ണു നാരായണൻ ചായാഗ്രഹണം നിർവഹിക്കുന്നു. കിരൺ ദാസാണ് എഡിറ്റർ.
കാവ്യ ഫിലിം കമ്പനിയും ആൻ മെഗാ മീഡിയയും ചേർന്നാണ് ചിത്രം നിർമിക്കുന്നത്.
