കൊച്ചി: വഖഫ് വിഷയത്തിൽ സ്വീകരിക്കുന്ന പ്രീണന നയത്തിന്റെ പേരിൽ ക്രിസ്തീയ സഭകളുടെ എതിർപ്പും രൂക്ഷ വിമർശനവും എൽഡിഎഫിനും യുഡിഎഫിനും വെല്ലുവിളിയാകുന്നു. വയനാട് ലോക്‌സഭാ മണ്ഡലമുൾപ്പെടെ മൂന്നിടങ്ങളിൽ ഉപതെരഞ്ഞെടുപ്പുകൾ നടക്കാനിരിക്കെ പേരെടുത്ത് പറഞ്ഞുളള സഭാ നേതൃത്വത്തിന്റെ പരസ്യ വിമർശനങ്ങൾ ഇരുമുന്നണികൾക്കും ഇരുട്ടടിയായിട്ടുണ്ട്. സീറോ മലബാർ സഭയിലെ മുതിർന്ന വൈദികനും കുടമാളൂർ സെന്റ് മേരീസ് പള്ളി വികാരിയുമായ ഫാ. മാണി പുതിയിടമാണ് ഏറ്റവും ഒടുവിൽ ഭരണ – പ്രതിപക്ഷ നിലപാടിനെതിരെ തുറന്നടിച്ച് രംഗത്തെത്തിയത്.
വിഡി സതീശന്റെയും പിണറായി വിജയന്റെയും പേരെടുത്ത് പറഞ്ഞുളള വൈദികന്റെ പ്രസംഗം സമൂഹമാദ്ധ്യമങ്ങളിലും പ്രചരിക്കുന്നുണ്ട്. ചിലർ ബിജെപിയിലേക്ക് നീങ്ങിയെന്ന് പറഞ്ഞ് നിങ്ങൾ ആരോടാണ് പരാതിപ്പെടുന്നതെന്ന് ഫാ. മാണി പുതിയിടം ചോദിക്കുന്നു. ബിജെപിയിലേക്ക് നീങ്ങുന്നതിന്റെ കാരണക്കാർ നിങ്ങൾ തന്നെയല്ലേ? നിങ്ങൾക്ക് വേണ്ടി ചില ചിഹ്നത്തിലൊക്കെ കുത്തി പരിചയിച്ച ചില ആളുകളുണ്ട്. അതൊന്നും നിലനിൽക്കില്ല. നിങ്ങൾ കൊണ്ടുവന്ന ചിഹ്നമൊന്നും മനസിൽ പതിഞ്ഞുകിടപ്പില്ല. മനുഷ്യന്റെ അസ്ഥിത്വമാനമാണ് ഇവിടെ പ്രശ്‌നമെന്നും അദ്ദേഹം തുറന്നടിക്കുന്നു.
പ്രത്യേകം ഒരു പ്രദേശം വഖഫ് ബോർഡിന്റെതാണെന്ന് അവിടുത്തെ വഖഫ് ഭാരവാഹികൾക്ക് തോന്നിയാൽ മതി. റവന്യൂ ബോർഡ് അത് അംഗീകരിച്ചു കഴിഞ്ഞിരിക്കും. അംഗീകരിക്കുക മാത്രമല്ല, ആധാരം കൈയ്യിലുളളവർ ഏതെങ്കിലും കാലത്ത് ചെന്നാൽ നിങ്ങൾക്ക് അങ്ങനൊരു ഭൂമിയേ അവിടെയില്ല എന്ന് പറയുമെന്നും ഫാ. മാണി പുതിയിടം വിമർശിച്ചു. മുനമ്പത്ത് സ്വന്തം ഭൂമിയിൽ കരമടയ്‌ക്കാൻ പോയപ്പോൾ ഭൂമി വഖഫിന്റെതാണെന്ന് പറഞ്ഞ് മടക്കി അയച്ച അനുഭവങ്ങൾ ചൂണ്ടിക്കാട്ടിയാണ് അദ്ദേഹത്തിന്റെ വിമർശനം.
വഖഫ് അധിനിവേശത്തിനെതിരെ മുനമ്പത്ത് റിലേ സത്യഗ്രഹം നടത്തുന്ന ഇരകളോട് ചേർന്നായിരുന്നു ഫാ. മാണി പുതിയിടത്തിന്റെ പ്രതികരണം. വഖഫിന് അമിതാധികാരമുള്ള നിയമങ്ങൾ കൊണ്ടുവന്നത് കോൺഗ്രസ് ആണെന്നും മാണി പുതിയിടം ആരോപിച്ചു. കേന്ദ്രസർക്കാർ കൊണ്ടുവന്ന വഖഫ് ഭേദഗതി ബില്ലിനെതിരെ കേരള നിയമസഭയിലെ ഭരണപക്ഷവും പ്രതിപക്ഷവും സംയുക്തപ്രമേയം പാസാക്കിയതിനെയും മാണി പുതിയിടം വിമർശിച്ചു.
