ഹനീഫ് അദേനി സംവിധാനം ചെയ്യുന്ന മാർക്കോയുടെ ഹിന്ദി ടീസർ പുറത്തിറങ്ങി. ബോളിവുഡ് നടൻ ജോൺ എബ്രഹാമാണ് ഫെയ്സ്ബുക്കിലൂടെ ടീസർ റിലീസ് ചെയ്തത്. ഹിന്ദി പ്രേക്ഷകരെ കൈയ്യിലെടുക്കാൻ ഉണ്ണി മുകുന്ദൻ ചിത്രത്തിന് സാധിക്കുമെന്നാണ് അണിയറ പ്രവർത്തകരുടെ പ്രതീക്ഷ.
വിശാലമായ കാൻവാസിൽ വൻ മുതൽമുടക്കിൽ എത്തുന്ന ചിത്രമാണ് മാർക്കോ. തെലുങ്ക് നടിയായ യുക്തി തരേജയാണ് ചിത്രത്തിലെ നായിക. ഹനീഫ് അദേനി തന്നെയാണ് ചിത്രത്തിന്റെ തിരക്കഥയും ഒരുക്കുന്നത്. ഹനീഫ് അദേനിയുടെ മിഖായേൽ എന്ന ചിത്രത്തിൽ ഉണ്ണി മുകുന്ദൻ അവതരിപ്പിച്ച ജൂനിയർ മാർക്കോ എന്ന വില്ലൻ കഥാപാത്രത്തെ നായകനാക്കിയാണ് ചിത്രം ഒരുക്കുന്നത്.
പുറത്തിറങ്ങിയ ഹിന്ദി ടീസറിന് വലിയ പ്രേക്ഷകശ്രദ്ധ ലഭിക്കുന്നുണ്ട്. ജോൺ എബ്രഹാം ടീസർ റിലീസ് ചെയ്യുമെന്ന വിവരം ഉണ്ണി മുകുന്ദൻ നേരത്തെ അറിയിച്ചിരുന്നു. ഉണ്ണി മുകുന്ദനോടൊപ്പം സിദ്ദിഖ്, ജഗദീഷ്, അഭിമന്യു തിലകൻ തുടങ്ങിയവരും ചിത്രത്തിൽ പ്രധാന വേഷത്തിലെത്തുന്നുണ്ട്.
ക്യൂബ്സ് എന്റർടൈൻമെന്റ്സ്, ഉണ്ണി മുകുന്ദൻ ഫിലിംസ് എന്നീ ബാനറുകളിൽ ഷെരീഫ് മുഹമ്മദാണ് ഈ ബിഗ് ബജറ്റ് ചിത്രം നിർമിക്കുന്നത്. മലയാളത്തിലെ ഏറ്റവും വയലന്റ് ചിത്രമായിരിക്കുമെന്ന വിശേഷണവും ഇതിനോടകം മാർക്കോയ്‌ക്ക് ലഭിച്ചിട്ടുണ്ട്.
