ഇന്ത്യയിലെ തങ്ങളുടെ ഏറ്റവും ജനപ്രിയ ബൈക്കുകളിലൊന്നായ ഹയബൂസ തിരിച്ചുവിളിച്ച് സുസുക്കി. 1056 ബൈക്കുകളാണ് ഇതിനോടകം കമ്പനി തിരിച്ചു വിളിക്കുന്നത്. ഫ്രണ്ട് ബ്രേക്ക് പ്രശ്നവുമായി ബന്ധപ്പെട്ടാണ് സുസുക്കിയുടെ ഇടപെടൽ. പ്രശ്നമുള്ള ബൈക്കിന്റെ ഉടമകൾ എത്രയും വേഗം തന്നെ കമ്പനിയുമായി ബന്ധപ്പെടേണ്ടതാണ്.
ഫ്രണ്ട് ബ്രേക്ക് ലിവർ പ്ലേ വർദ്ധിക്കുന്നു. ഏറ്റവും മോശം സാഹചര്യത്തിൽ, ലിവർ ത്രോട്ടിൽ ഗ്രിപ്പുമായി ബന്ധപ്പെടുകയും ബ്രേക്കിംഗ് ദൂരം വർദ്ധിക്കുകയും ചെയ്യുന്നു. ഇതാണ് തകരാർ സംബന്ധിച്ച് കമ്പനിയുടെ ഔദ്യോഗിക വിശദീകരണം. ലളിതമായി പറഞ്ഞാൽ, ബൈക്കുകളുടെ ഫ്രണ്ട് ബ്രേക്ക് ലിവർ വളരെ മൃദുവായേക്കാം. ബ്രേക്ക് പിടിച്ചാലും ആവശ്യത്തിന് സ്റ്റോപ്പിംഗ് പവർ തിരികെ നൽകാതെ അത് എല്ലായിടത്തും വന്ന് ആക്സിലറേറ്ററിൽ സ്പർശിച്ചേക്കാം. ഇത് പ്രതീക്ഷിക്കുന്നിടത്ത് വണ്ടി നിൽക്കാതെ അപകടം വിളിച്ചു വരുത്തും.
നിലവിലുള്ള തേർഡ്-ജെൻ ഹയബൂസയിൽ ബ്രെംബോ സ്റ്റൈൽമ കാലിപ്പറുകൾ ഒരു ജോഡി 320 എംഎം ഡിസ്കുകളിൽ ഘടിപ്പിച്ചിരിക്കുന്നു. ഹയബൂസയുടെ പ്രധാന ഹൈലൈറ്റ് എഞ്ചിനാണ്. 1,340cc, 190bhp, 142Nm ഉത്പാദിപ്പിക്കുന്ന ഇൻലൈൻ ഫോർ-സിലിണ്ടർ മോട്ടോറാണ് ബൈക്കിന്. 16.90 ലക്ഷം രൂപയാണ് ഹയബൂസിന്റെ എക്സ്-ഷോറൂം വില. സുസുക്കി ഹയബൂസ ഇന്ത്യയിൽ ലഭ്യമായ ഏറ്റവും വിലയുള്ള ബൈക്കുകളിൽ ഒന്നാണ്.
