ന്യൂയോർക്ക് സിറ്റിയിലെ സ്കൂളുകൾക്ക് ചരിത്രത്തിലാദ്യമായി ദീപാവലി അവധി പ്രഖ്യാപിച്ചു. നവംബർ ഒന്നിനാകും സ്കൂളുകൾക്ക് അവധി നൽകുക. ഇതാദ്യമായാണ് നഗരത്തിലെ സ്കൂളുകൾ അവധി പ്രഖ്യാപിക്കുന്നത്.
ഈ വർഷത്തെ ദീപാവലി സവിശേഷമാണെന്നും ന്യൂയോർക്ക് നഗരത്തിന്റെ ചരിത്രത്തിലാദ്യമായി സ്കൂളുകൾക്ക് അവധിയായിരിക്കുമെന്ന് മേയറുടെ ഓഫീസിലെ ഡെപ്യൂട്ടി കമ്മീഷണർ ദിലീപ് ചൗഹാൻ പറഞ്ഞു. നഗരത്തിൽ വിവിധ മതവിഭാഗങ്ങളിൽ പെടുന്ന 1.1 ദശലക്ഷം സ്കൂൾ വിദ്യാർത്ഥികളാണുള്ളത്. ദീപാവലി ദിനത്തിൽ കുട്ടികൾക്ക് ക്ഷേത്ര ദർശനവും മറ്റും നടത്തേണ്ടതുള്ളത് കൊണ്ടാണ് അവധി അനുവദിക്കുന്നതെന്ന് അദ്ദേഹം പറഞ്ഞു. എന്നാൽ അന്നേ ദിനം പൊതു അവധിയായിരിക്കില്ലെന്നും മറിച്ച് ക്ഷേത്രങ്ങളിൽ പോകേണ്ട കുട്ടികൾക്ക് അങ്ങനെയാകാമെന്നും സ്കൂളുകളിൽ എത്തണമെന്ന് കർശന നിർദ്ദേശം നൽകില്ലെന്നും മേയറുടെ ഓഫീസ് വ്യക്തമാക്കി.
ദീപാവലി പൊതു അവധിയായി പ്രഖ്യാപിച്ചതിന് പിന്നാലെ മേയർ എറിക് ആഡംസിന് ചൗഹാൻ നന്ദി അറിയിച്ചു. നേരത്തെ ജൂണിൽ ന്യൂയോർക്ക് സിറ്റി ഔദ്യോഗികമായി ദീപാവലി പൊതുഅവധിയായി പ്രഖ്യാപിച്ചിരുന്നു. ദീപങ്ങളുടെ ഉത്സവമാണ് ദീപാവലിയെന്നും ഹിന്ദുക്കളും ജൈനരും സിഖ് മതവിശ്വാസികളും ബുദ്ദമതക്കാരും ഒരു പോലെ ദീപാവലി ആഘോഷിക്കപ്പെടുന്നുവെന്നും ചൗഹാൻ കൂട്ടിച്ചേർത്തു.
വൈറ്റ് ഹൗസും ദീപാവലി ആശംസ അറിയിച്ചിട്ടുണ്ട്. നേരത്തെ ദീപാവലി ആഘോഷവും സംഘടിപ്പിച്ചിരുന്നു. ലോക വ്യാപാര സംഘടനയുടെ അടക്കം നഗരത്തിലെ വിവിധ കെട്ടിടങ്ങളിൽ ദീപാവലിയോടനുബന്ധിച്ച് ദീപാലംകൃതമാക്കിയിട്ടുണ്ട്.
