മതമൗലികവാദികളുടെ ഭീഷണികളെ അതിജീവിച്ച് രാമനും , കദീജയും പ്രദർശനത്തിനെത്തുന്നു . ചിത്രകലാരംഗത്തും, സാഹിത്യ രംഗത്തും ഏറെക്കാലമായി പ്രവർത്തിച്ചു പോരുന്ന ദിനേശ് പൂച്ചക്കാടാണ് ചിത്രം സംവിധാനം ചെയ്തിരിക്കുന്നത്. കാഞ്ഞങ്ങാട് ഫിലിംസിന്റെ ബാനറിൽ ബിനരാജ് കാഞ്ഞങ്ങാട്, സതീഷ് കാനായി എന്നിവർ ചേർന്നാണ് ചിത്രം നിർമ്മിച്ചിരിക്കുന്നത്. നാടോടികളായ രാമന്റെയും, കദീജയുടെയും പ്രണയവും അതിന് പിന്നാലെ ഉണ്ടാകുന്ന പ്രശ്നങ്ങളുമാണ് ചിത്രത്തിന്റെ ഇതിവൃത്തം .
ചിത്രത്തിന്റെ സംവിധായകൻ ദിനേശിന് അടുത്തിടെ മതമൗലികവാദികളിൽ നിന്ന് ഭീഷണികൾ വന്നിരുന്നു . സിനിമയുടെ പ്രമേയമാണ് വധഭീഷണിക്ക് കാരണമായത്. ചിത്രത്തിന് രാമനും , കദീജയും എന്ന് പേരിട്ടത് എന്തിനാണെന്ന് ചോദിച്ചാണ് ഭീഷണികൾ വരുന്നത് . വീടിനു മുന്നിൽ നിന്ന് ലഭിച്ച ഭീഷണി കത്തിലും അതാണ് പറയുന്നതെന്നും , ഒപ്പം അസഭ്യവാക്കുകളുമുണ്ടെന്നും ദിനേശൻ പൂച്ചക്കാട് പറഞ്ഞിരുന്നു.
പ്രശാന്ത് കുമാർ, മോഹൻ ചന്ദ്രൻ, ഹരി ടി.എൻ., ഊർമ്മിളാ വൈശാഖ്, ഓമന, പ്രേമലത, സുരേന്ദ്രൻ പൂക്കാനം, മല്ലക്കര രാമചന്ദ്രൻ, സതീഷ് കാനായി എന്നിവരാണ് പ്രധാന വേഷത്തിൽ എത്തുന്നത് .
