“കണ്ട് പഠിക്കണം”; രാമായണത്തിലെ ലങ്കയും അശോകവനവും പരിചയപ്പെടുത്തുന്ന മുത്തശ്ശി; കയ്യടി നേടി ശ്രീലങ്കൻ എയർലൈൻസിന്റെ പരസ്യം

രാമായണത്തിലെ ചരിത്ര പ്രസിദ്ധമായ സ്ഥലങ്ങളിലൂടെയുള്ള യാത്ര വിവരിക്കുന്ന ശ്രീലങ്കൻ എയർലൈൻസിന്റെ പരസ്യത്തിന് സോഷ്യൽ മീഡിയയിൽ നിറഞ്ഞ കയ്യടി. രാമായണ കഥയിലൂടെ ആത്മീയ വിനോദസഞ്ചാരം പ്രോത്സാഹിപ്പിക്കുന്നതിനുള്ള ശ്രീലങ്കൻ എയർലൈൻസിന്റെ പുതിയ സംരംഭത്തിനായാണ് പരസ്യം പുറത്തിറക്കിയത്.

അഞ്ച് മിനിറ്റ് ദൈർഘ്യമുള്ള പരസ്യത്തിൽ ഒരു മുത്തശ്ശി കുട്ടികളുടെ പുസ്തകത്തിൽ നിന്ന് തന്റെ പേരക്കുട്ടിക്ക് രാമായണ കഥ വിവരിക്കുന്നതായി കാണിക്കുന്നു. രാവണൻ സീതയെ തട്ടിക്കൊണ്ടു പോയ ദ്വീപിനെക്കുറിച്ച് ചെറുമകൻ ചോദിക്കുമ്പോൾ ആധുനിക ശ്രീലങ്കയിലെ രാവണരാജ്യത്തിന്റെ കഥ മുത്തശ്ശി അവന് വിവരിക്കുന്നു.

സീതയെ അശോക വനത്തിലേക്ക് മാറ്റുന്നതിന് മുൻപ് പാർപ്പിച്ചിരുന്ന എല്ല പട്ടണത്തിനടുത്തുള്ള രാവണന്റെ ഗുഹ, ശ്രീലങ്കയിലെ ഇന്ത്യൻ തമിഴർ പരിപാലിക്കുന്ന അശോക് വടിക സീതാ ക്ഷേത്രം എന്നറിയപ്പെടുന്ന സീത അമ്മൻ ക്ഷേത്രം, രാമസേതു, ഹനുമാൻ അടർത്തിയെടുത്തപ്പോൾ താഴേക്ക് പതിച്ചതെന്ന് കരുതപ്പെടുന്ന റുമാസാല കുന്ന് തുടങ്ങി രാമായണത്തിൽ പറയുന്ന ലങ്കയിലെ ചരിത്ര സ്ഥലങ്ങളെല്ലാം വീഡിയോയിൽ ഉൾപ്പെടുത്തിയിട്ടുണ്ട്.

Relive the epic of The Ramayana Trail

Embark on a journey through Sri Lanka’s legendary landscapes with SriLankan Holidays, offering a fully customized experience tailored just for you. Every step of your adventure is designed to bring out the grandeur and glory in the ancient… pic.twitter.com/jctUhc4JKn

— SriLankan Airlines (@flysrilankan) November 8, 2024

പരസ്യത്തിന് സമൂഹമാദ്ധ്യമങ്ങളിൽ മികച്ച പ്രതികരണങ്ങളാണ് ലഭിക്കുന്നത്. “ഇത്രയും ഗംഭീരമായ മറ്റൊരു പരസ്യം കണ്ടിട്ടില്ല. ഞെട്ടിപ്പോയി. നമ്മുടെ ടൂറിസം മേഖല ഇതിൽ നിന്ന് പഠിക്കേണ്ടതുണ്ട്” ഉപയോക്താക്കളിലൊരാൾ കുറിച്ചു.”ഏറ്റവും മികച്ച എയർലൈൻ പരസ്യങ്ങളിൽ ഒന്ന്” മറ്റൊരാൾ അഭിപ്രായപ്പെട്ടു. പരസ്യത്തിലൂടെ ശ്രീലങ്കയുടെ സമ്പന്നമായ പൈതൃകം ഉയർത്തിക്കാട്ടിയ എയർലൈൻസിനെ പ്രശംസിക്കാനും ആളുകൾ മറന്നില്ല.