പന്തളം: മണ്ഡലകാല മകരവിളക്ക് തീർത്ഥാടനത്തിനായി ശബരിമല ക്ഷേത്രനട ഒരു മണിക്കൂർ നേരത്തെ തുറക്കും. ഇന്ന് വൈകിട്ട് നാലിനാണ് നട തുറക്കുന്നത്. പുതിയ മേൽശാന്തിമാരും ഇന്ന് ചുമതലയേൽക്കും. 5 മണിക്ക് നട തുറക്കാനായിരുന്നു നേരത്തെ തീരുമാനിച്ചത്. എന്നാൽ ഭക്തർക്ക് സുഗമമായ ദർശനം ഒരുക്കുന്നതിനായി ഒരു മണിക്കൂർ നേരത്തെ നട തുറക്കാൻ തീരുമാനിക്കുകയായിരുന്നു.
30,000 ഭക്തരാണ് ദർശനത്തിനെത്തുന്നതിനായി ഇന്ന് ബുക്ക് ചെയ്തിരിക്കുന്നത്. വെർച്വൽ ക്യൂ വഴി ബുക്ക് ചെയ്യുന്നത് 70,000 ത്തിൽ നിന്നും ഉയർത്തുന്നത് ആലോചിക്കുന്നില്ലെന്ന് തിരുവിതാംകൂർ ദേവസ്വം ബോർഡ് വ്യക്തമാക്കി. ശബരിമലയിൽ എത്തുന്ന എല്ലാ ഭക്തർക്കും ദർശനത്തിനായുള്ള സൗകര്യം ഒരുക്കുമെന്നും അധികൃതർ വ്യക്തമാക്കി.
സ്ത്രീകൾക്കും കുട്ടികൾക്കും തിരക്കില്ലാതെ ദർശനം നടത്തുന്നതിനായി പ്രത്യേക ക്യൂ ഉണ്ടായിരിക്കും. 18 മണിക്കൂർ ദർശന സൗകര്യമുണ്ടാകുമെന്നും അധികൃതർ വ്യക്തമാക്കി.
