60-കളിൽ മുംബൈ, സൂറത്ത് എന്നിവിടങ്ങളിൽ സർവീസ് നടത്തിയിരുന്ന ട്രെയിനാണ് മുംബൈ-വത്സാദ് പാസഞ്ചർ ട്രെയിൻ. കാലങ്ങളായി നിരവധി പേരുടെ ആശ്രയമാണ് ഈ ട്രെയിൻ. ഈ ട്രെയിൻ ഡിസംബർ പകുതിയോടെ സർവീസ് നിർത്തലാക്കാൻ പോകുന്നുവെന്ന വാർത്തയാണ് പ്രചരിക്കുന്നത്. ഇനി മുതൽ പ്ലാറ്റ്ഫോമിൽ ട്രെയിൻ നമ്പർ 09023, 24 മുഴങ്ങില്ല, പകരം ‘റെസ്റ്റോറൻ്റ് ഓൺ വീൽസായി’ മാറാനൊരുങ്ങുകയാണ് ഈ ഡബിൾ ഡെക്കർ ട്രെയിൻ.
അവശേഷിക്കുന്ന റേക്കിന്റെയും ആയുസ് അവസാനിച്ചെന്നും ഈ സാഹചര്യത്തിലാണ് സർവീസ് നിർത്താൻ പദ്ധതിയിടുന്നതെന്നും വെസ്റ്റേൺ റെയിൽവേ അറിയിച്ചു. ഇവയിൽ ഒരു കോച്ച് റെസ്റ്റോറൻ്റാക്കി മാറ്റുമെന്നും അധികൃതർ അറിയിച്ചു. ലോവർ പരേൽ റെയിൽവേ സ്റ്റേഷന്റെ പടിഞ്ഞാറ് വശത്തെ ഒന്നാം നമ്പർ പ്ലാറ്റ്ഫോമിനോട് ചേർന്നാകും റെസ്റ്റോറൻ്റ് തുടങ്ങുക.
പ്രതിദിനം 800 മുതൽ 900 വരെ യാത്രക്കാരെ വഹിക്കുന്ന ട്രെയിനാണ് ഓർമയാകാൻ പോകുന്നത്. നിലവിൽ 18 കോച്ചുകളാണ് ട്രെയിനുള്ളത്. ഇതിൽ 11 എണ്ണം ഡബിൾ ഡെക്കർ കോച്ചുകളാണ്. തലമുറകളോളം നിരവധി പേരുടെ യാത്രയിൽ ഗണ്യമായ പങ്ക് വഹിച്ച ട്രെയിനാണ് മുംബൈ-വത്സാദ് ഫാസ്റ്റ് പാസഞ്ചർ ട്രെയിൻ.
