ലേഡി സൂപ്പർസ്റ്റാർ നയൻതാരയുടെ 40-ാം പിറന്നാളിനോടനുബന്ധിച്ച് പുതിയ സിനിമയുടെ പോസ്റ്റ പുറത്തിറക്കി അണിയറപ്രവർത്തകർ. പുതുമുഖ സംവിധായകനായ സെന്തിൽ നല്ലസാമി സംവിധാനം ചെയ്യുന്ന “റാക്കായി” എന്ന ചിത്രത്തിന്റെ ടൈറ്റിൽ ലുക്ക് ടീസറാണ് പുറത്തുവിട്ടിരിക്കുന്നത്. ഡ്രംസ്റ്റിക് പ്രൊഡക്ഷൻസും മൂവിവേഴ്സ് സ്റ്റുഡിയോസും ചേർന്ന് നിർമിക്കുന്ന സിനിമയാണ് “റാക്കായി”
പീരിയഡ് ആക്ഷൻ ഡ്രാമ ജോണറിൽ വരുന്ന ചിത്രത്തിൽ തീർത്തും വ്യത്യസ്തമായ കഥാപാത്രവുമായാണ് നയൻതാര എത്തുന്നത്. താരത്തിന്റെ കരിയറിലെ ഏറ്റവും സവിശേഷമായ കഥാപാത്രമാകും റക്കായിലേതെന്നാണ് സൂചന. ആക്ഷന് പ്രാധാന്യമുള്ള കഥാപാത്രമാണിത്.
ഗോവിന്ദ് വസന്ത സംഗീതം ഒരുക്കുന്ന ചിത്രത്തിൽ ഗൗതം രാജേന്ദ്രൻ ഛായാഗ്രഹണവും പ്രവീൺ ആന്റണി എഡിറ്റിംഗും നിർവ്വഹിക്കുന്നു. സിനിമയിലെ മറ്റ് താരങ്ങൾ ആരെല്ലാമാണെന്ന് വൈകാതെ പുറത്തുവിടും.
നയൻതാരയുടെ പിറന്നാൾ ദിനമായ ഇന്ന് വിവാദ ഡോക്യുമെന്ററി ‘നയൻതാര: ബിയോണ്ട് ദ ഫെയറി ടെയിൽ’ നെറ്റ്ഫ്ലിക്സിലൂടെ റിലീസ് ചെയ്തിരുന്നു. സമ്മിശ്രപ്രതികരണമാണ് ഡോക്യുമെന്ററി നേടുന്നത്.
