ജീവിതകഥ പറയുന്ന ‘നയൻതാര ബിയോണ്ട് ദി ഫെ്യറി ടെയ്ൽ’ എന്ന ഡോക്യൂമെന്റിയുമായി ബന്ധപ്പെട്ട വിവാദങ്ങൾക്കിടെ നയൻതാരയ്‌ക്ക് പിന്തുണയുമായി തെന്നിന്ത്യൻ നടി ജാൻവി കപൂർ. ശക്തയായ ഒരു സ്ത്രീയ്‌ക്ക് മറ്റൊരു സ്ത്രീ ശക്തയാകുന്നതിനേക്കാൾ പ്രചോദനം നൽകുന്ന മറ്റൊന്നില്ലെന്ന് ജാൻവി കപൂർ ഇൻസ്റ്റഗ്രാം സ്റ്റോറിയിൽ കുറിച്ചു. ഡോക്യുമെന്ററിയുടെ പോസ്റ്റർ പങ്കുവച്ചുകൊണ്ടായിരുന്നു താരത്തിന്റെ വാക്കുകൾ.
ജാൻവി കപൂറിന്റെ പോസ്റ്റിന് പിന്നാലെ നന്ദി അറിയിച്ച് നയൻതാരയും രംഗത്തെത്തി. ‘പ്രിയപ്പെട്ട ജാൻവി, ഡോക്യുമെന്ററി കണ്ടതിന് ശേഷം സോഷ്യൽ മീഡിയയിൽ പങ്കുവച്ച നിന്റെ വാക്കുകൾ എന്നെ ആഴത്തിൽ സ്പർശിച്ചു. എന്നും ഒരുപാട് സ്നേഹം’- എന്നാണ് നയൻതാര കുറിച്ചത്.
ധനുഷിനെതിരെയുള്ള ആരോപണത്തിൽ നിരവധി പേരാണ് താരത്തെ പ്രിതകൂലിച്ചും അനുകൂലിച്ചും രംഗത്തെത്തുന്നത്.‘നാനും റൗഡി താൻ’ എന്ന ചിത്രത്തിലെ ചില രംഗങ്ങളും അണിയറ ദൃശ്യങ്ങളും ഡോക്യുമെന്ററിയിൽ ഉപയോഗിച്ചതിന് നയൻതാരക്കെതിരെ ധനുഷ് വക്കീൽ നോട്ടീസ് അയച്ചിരുന്നു. പിന്നാലെ ധനുഷിനെ പരസ്യമായി വിമർശിച്ചുകൊണ്ട് നയൻതാരയും എത്തിയിരുന്നു.
