ദുബായിൽ ടാക്സി സേവനങ്ങൾ മെച്ചപ്പെടുത്താൻ ഗതാഗത വിഭാഗം. ടാക്സികളിൽ പുകവലി കണ്ടെത്താൻ എ.ഐ കാമറ സ്ഥാപിക്കും. വാഹനത്തിന്റെയും ഡ്രൈവർമാരുടെയും ശുചിത്വം കണ്ടെത്താൻ പരിശോധനകൾ ആരംഭിക്കും.
ദുബായിലെ ടാക്സി സേവനങ്ങൾ മെച്ചപ്പെടുത്തുന്നതിന്റെ ഭാഗമായാണ് പരിഷ്കരണങ്ങൾ നടപ്പാക്കുന്നത്. ടാക്സി യാത്രക്കാർക്ക് സുരക്ഷിതവും സുഗമവുമായ യാത്രാനുഭവങ്ങൾ നൽകാനാണ് ഇതിലൂടെ ലക്ഷ്യമിടുന്നത്. കാറിനകത്ത് പുകവലി കണ്ടെത്തുന്നതിന് നിർമിത ബുദ്ധിയിൽ പ്രവർത്തിക്കുന്ന അത്യാധുനിക കാമറകളും ഘടിപ്പിക്കും. 500 എയർപോർട്ട് ടാക്സികളിൽ പരീക്ഷണാടിസ്ഥാനത്തിൽ എയർ ഫ്രഷ്നറുകൾ ഉപയോഗിക്കാൻ തുടങ്ങി. വാഹനങ്ങളിലെ ശുചിത്വം പ്രോത്സാഹിപ്പിക്കുന്നതിനായി പ്രഖ്യാപിച്ച പുതിയ സംരംഭത്തിന്റെ ഭാഗമായാണ് നടപടി. ഇതോടൊപ്പം എമിറേറ്റിലുടനീളം ബോധവത്കരണ കാമ്പയിനുകളും പദ്ധതിയുടെ ഭാഗമായി സംഘടിപ്പിക്കും.
വാഹനത്തിന്റെയും ഡ്രൈവർമാരുടെയും ശുചിത്വം കണ്ടെത്തുന്നതിനായി പ്രതിമാസം വിലയിരുത്തലുകൾ നടത്തും. കൂടാതെ ഓരോ ലക്ഷം കിലോമീറ്റർ ഹാല ടാക്സി ട്രിപ്പുകളിലും ശുചിത്വവുമായി ബന്ധപ്പെട്ട നിരീക്ഷണങ്ങൾ ട്രാക്ക് ചെയ്യാനും പുതിയ അളവ് സൂചിക ഉപയോഗപ്പെടുത്തും. അതോടൊപ്പം വാഹനങ്ങളുടെയും ഡ്രൈവർമാരുടെയും ശുചിത്വത്തിൽ കേന്ദ്രീകരിച്ച് ഉപഭോക്താക്കളുടെ സംതൃപ്തി സർവേകളും ഷോപ്പർ അസസ്മെൻറുകളും 2025 പുകുതിയോടെ ആരംഭിക്കുമെന്ന് ആർ.ടി.എ അറിയിച്ചു.
