ക്യാമറയ്ക്ക് മുന്നിൽ ക്രൂരനായും ക്യാമറയ്ക്ക് പുറത്ത് പച്ചയായ മനുഷ്യനായും സിനിമാപ്രേമികളുടെ ഹൃദയം കവർന്ന മേഘനാഥന് വിടപറഞ്ഞ് സിനിമാ ലോകം. വിയോഗത്തിൽ കേന്ദ്രമന്ത്രിയും നടനുമായ സുരേഷ് ഗോപി ദുഃഖം പങ്കുവച്ചു. സമൂഹമാദ്ധ്യമമായ ഫെയ്സ്ബുക്കിലൂടെയാണ് അദ്ദേഹം മേഘനാഥന് ആദരാഞ്ജലികൾ അർപ്പിച്ചത്.
” എനിക്ക് ഏറ്റവും പ്രിയപ്പെട്ട മേഘനാഥന് ആദരാഞ്ജലികൾ”- സുരേഷ് ഗോപി കുറിച്ചു. ക്രൈം ഫയൽ എന്ന ചിത്രത്തിലാണ് സുരേഷ് ഗോപിയും മേഘനാഥനും ഒരുമിച്ച് പ്രേക്ഷകർക്ക് മുന്നിലെത്തിയത്. സ്റ്റീഫൻ എന്ന കഥാപാത്രത്തെയായിരുന്നു മേഘനാഥൻ അവതരിപ്പിച്ചത്.
വില്ലനായ കാളിയാർ പത്രോസായി വേഷമിട്ട ജനാർദ്ദനന്റെ മകനായാണ് മേഘനാഥൻ സിനിമയിലെത്തിയത്. കുറ്റകൃത്യം അന്വേഷിക്കാനെത്തുന്ന പൊലീസ് ഉദ്യോഗസ്ഥനായിരുന്നു ക്രൈം ഫയലിൽ സുരേഷ് ഗോപി.
ഇന്ന് പുലർച്ചയോടെയാണ് മേഘനാഥൻ അന്തരിച്ചത്. ശ്വാസകോശ സംബന്ധമായ രോഗങ്ങളെ തുടർന്ന് കോഴിക്കോട് സ്വകാര്യ ആശുപത്രിയിൽ ചികിത്സയിലിരിക്കെയായിരുന്നു അന്ത്യം. ആസിഫ് അലി നായകനായി എത്തിയ കൂമനിലാണ് അദ്ദേഹം അവസാനമായി അഭിനയിച്ചത്.
