രണ്ട് സെൻ്റിൽ വീട്, അഞ്ച് സെന്റിൽ വീട് എന്നൊക്കെ കേട്ടിട്ടുണ്ടാകും. റോഡരികിലെ വീടും ഉള്ളിലേക്കുള്ള വീടുമൊക്കെ സുപരിചിതം. എന്നാൽ റോഡിന്റെ ഇരുവശങ്ങളിലുമായി ഒരു വീട് നിർമിച്ചാലോ? അതെ, അത്തരത്തിലൊരു വീടാണ് സോഷ്യൽ മീഡിയയിൽ വൈറലാകുന്നത്.
റോഡിന് നടുവിൽ ഇരുനില വീട് നിർമിച്ചിരിക്കുകയാണ്. ബദൽതി ഹേ ദുനിയ എന്ന ഇൻസ്റ്റാഗ്രാം പേജാണ് വീടിന്റെ ചിത്രം പങ്കുവെച്ചിരിക്കുന്നത്. റോഡിന് നടുവിലാണ് വീട് നിർമിച്ചിരിക്കുന്നതെങ്കിലും റോഡിലൂടെ പോകുന്നവർക്ക് യാതൊരുവിധ പ്രശ്നവും സൃഷ്ടിക്കുന്നില്ലെന്നതാണ് പ്രത്യേകത. വീടിനെ താങ്ങി നിർത്താനായി റോഡിന്റെ ഇരുവശത്തും ഭിത്തികൾ നിർമിച്ചിട്ടുണ്ട്. ഇടതുവശത്ത് ഒരു ഗോവണി നിർമിച്ചിട്ടുണ്ട്. ഈ പടികൾ കയറിയെത്തുന്നത് വീടിന്റെ പ്രവേശന വാതിലേക്കാണ്. മുകളിലത്തെ നിലയിൽ ബാൽക്കണി പോലെയും നിർമിച്ചിട്ടുണ്ട്.
13 ലക്ഷത്തിലധികം പേരാണ് ഈ ചിത്രം ഇൻസ്റ്റഗ്രാമിൽ ലൈക്ക് ചെയ്തിരിക്കുന്നത്. ചിത്രം സമൂഹമാദ്ധ്യമങ്ങൾ ഏറ്റെടുത്തെങ്കിലും വീടിന്റെ ഉടമയെ കുറിച്ചോ മറ്റ് വിവരങ്ങളോ ലഭ്യമല്ല. പുതുതായി വീട് നിർമിക്കാൻ പോകുന്നവരുടെ ഉള്ളിൽ തീർച്ചയായും ഈ വീട് കോളിളക്കം സൃഷ്ടിക്കുമെന്ന് തീർച്ച.
