ന്യൂഡൽഹി: ഇന്ത്യയുടെ പ്രധാന ആഭ്യന്തര ടൂർണമെൻ്റായ സയ്യിദ് മുഷ്താഖ് അലി ട്രോഫിയിൽ മികച്ച പ്രകടനം കാഴ്ചവച്ച സീനിയർ താരങ്ങളെ അഭിനന്ദിച്ച് ബിസിസിഐ സെക്രട്ടറി ജയ് ഷാ. ഭാവി താരങ്ങൾക്കൊപ്പം ഉവീറും വാശിയോടെയും സീനിയർ താരങ്ങൾ കളിക്കുന്നത് മനോഹരമായ കാഴ്‌ചയാണെന്ന് അദ്ദേഹം അഭിപ്രായപ്പെട്ടു. സഞ്ജു സാംസൺ, ഭുവനേശ്വർ കുമാർ, ശ്രേയസ് അയ്യർ തുടങ്ങിയ സീനിയർ താരങ്ങൾ ആഭ്യന്തര ടൂർണമെന്റിൽ മികച്ച പ്രകടനമാണ് പുറത്തെടുത്തത്.
എക്‌സിൽ പങ്കുവച്ച പോസ്റ്റിലാണ് ജയ് ഷാ താരങ്ങളെ പ്രശംസിച്ചത്. മുതിർന്ന താരങ്ങളുടെ അറിവും അനുഭവ സമ്പത്തും പങ്കിടുന്നതിനും ടൂർണമെന്റ് വേദിയാകുമെന്ന് ജയ് ഷാ പറഞ്ഞു. “ആഭ്യന്തര ടി20 മത്സരമായ സയ്യിദ് മുഷ്താഖ് അലി ട്രോഫിയിൽ വലിയ മത്സരവും തീവ്രതയും കാണുന്നതിൽ സന്തോഷമുണ്ട്. ഇന്ത്യൻ ക്രിക്കറ്റ് ടീമിലെ മുതിർന്ന താരങ്ങൾ ഭാവി തലമുറയ്‌ക്കൊപ്പം പങ്കെടുക്കുകയും കളിക്കുകയും ചെയ്യുന്നു, അവരുടെ അന്താരാഷ്‌ട്ര കരിയറിലെ അനുഭവും അറിവുകളും പങ്കിടുന്നു,” ജയ് ഷാ പറഞ്ഞു.
സയ്യിദ് മുഷ്താഖ് അലി ട്രോഫി ഇന്ത്യൻ ക്രിക്കറ്റിൽ വളർന്നുവരുന്ന പ്രതിഭകളുടെ വിളനിലമാണ്. ഇന്ത്യൻ ക്രിക്കറ്റിന്റെ ഭാവി രൂപപ്പെടുത്തുന്നതിൽ ടൂർണമെന്റിന് നിർണായക പങ്കുണ്ട്. നിലവിൽ ഗ്രൂപ്പ് എ യിൽ നാല് വിജയങ്ങളുമായി രാജസ്ഥാൻ ഒന്നാം സ്ഥാനത്തും മധ്യപ്രദേശ് രണ്ടാം സ്ഥാനത്തുമാണ്. ഗ്രൂപ്പ് ബിയിൽ നാല് കളികളിൽ നാല് ജയവുമായി ബറോഡയാണ് ഒന്നാമത്. ഗ്രൂപ്പ് സിയിൽ നാല് വിജയവുമായി ഡൽഹിയും ഒന്നാം സ്ഥാനത്താണ്.
