ദുബായ്: യുഎഇയിൽ ഡിസംബർ മാസത്തിലെ ഇന്ധനവില പ്രഖ്യാപിച്ചു. കഴിഞ്ഞ മാസത്തെ അപേക്ഷിച്ച് എല്ലാത്തരം പെട്രോളിനും വില കുറഞ്ഞു. ഡീസലിന് നേരിയ വില വർദ്ധനവും രേഖപ്പെടുത്തി.
ദേശിയ ഇന്ധനസമിതി പുറത്തിറക്കിയ അറിയിപ്പ് പ്രകാരം രാജ്യത്ത് ഇനിമുതൽ സൂപ്പർ പെട്രോളിന്റെയും സ്പെഷ്യൽ പെട്രോളിന്റെയും വിലയില് 13 ഫില്സിന്റെ കുറവാണ് ഉണ്ടാവുക. 12 ഫിൽസിന്റെ കുറവാണ് ഇ – പ്ലസിനുള്ളത്. സൂപ്പർ പെട്രോളിന് 2 ദിർഹം 61 ഫിൽസും സ്പെഷ്യൽ പെട്രോളിന് 2 ദിർഹം 50 ഫിൽസുമാണ് പുതിയ നിരക്ക്.
ഇ – പ്ലസിന്റെ വില 2 ദിർഹം 55 ഫിൽസിൽ നിന്നും 2 ദിർഹം 43 ഫിൽസ് ആയി. അതേസമയം ഡീസലിന് 2 ദിർഹം 67 ഫിൽസിൽ നിന്നും 2 ദിർഹം 68 ഫിൽസ് ആയാണ് വില കൂടിയത്. പുതിയ നിരക്ക് ഞായറാഴ്ച മുതൽ നിലവിൽ വരും. രാജ്യാന്തരതലത്തിലെ എണ്ണവില പ്രതിദിനം വിശകലനം ചെയ്തശേഷം ഇന്ധനസമിതി യോഗം ചേർന്നാണ് യുഎഇയിലെ ഇന്ധന വില തീരുമാനിക്കുന്നത്. വിലയ്ക്ക് അനുസൃതമായി വിവിധ എമിറേറ്റുകളില് ടാക്സി, ബസ് നിരക്കിലും മാറ്റം വരാറുണ്ട്.
