ഹൈദരാബാദ്: കന്നട സിനിമാ- സീരിയൽ താരം ശോഭിത ശിവണ്ണയെ മരിച്ച നിലയിൽ കണ്ടെത്തി. ഹൈദരാബാദിലെ ഗച്ചിബൗളി ശ്രീറാം നഗർ കോളനിയിലെ വീട്ടിൽ തൂങ്ങിമരിച്ച നിലയിലാണ് കണ്ടെത്തിയത്. സംഭവത്തിൽ അന്വേഷണം ആരംഭിച്ചതായും മൃതദേഹം പോസ്റ്റുമോർട്ടത്തിനായി ആശുപത്രിയിലേക്ക് മാറ്റിയതായും പൊലീസ് അറിയിച്ചു.
കന്നട സിനിമകൾക്ക് പുറമെ തെലുങ്ക് സിനിമകളിലും ശോഭിത ശ്രദ്ധകേന്ദ്രീകരിച്ച് വരികയായിരുന്നു. ‘ എടിഎം’, ‘ ജാക്ക്പോട്ട്, അപ്പാർട്ട്മെന്റ് ടു മർഡർ, വന്ദന, ഒന്ന് കഥേ ഹേല തുടങ്ങിയ സിനിമകളിൽ ശോഭിത വേഷമിട്ടുണ്ട്. ഇതിനുപുറമെ ബ്രഹ്മഗന്തു, നിനിദാലെ തുടങ്ങിയ സീരിയലുകളിൽ അഭിനയിച്ചും താരം പ്രേക്ഷകശ്രദ്ധ നേടിയിരുന്നു.
കഴിഞ്ഞ വർഷമായിരുന്നു ശോഭിതയുടെ വിവാഹം നടന്നത്. സുധീറാണ് ഭർത്താവ്. വിവാഹത്തിന് ശേഷം അഭിനയത്തിൽ നിന്നും ഇടവേള എടുത്തിരുന്നെങ്കിലും പൊതുപരിപാടികളിൽ താരം പ്രത്യക്ഷപ്പെട്ടിരുന്നു. ആത്മഹത്യയാണെന്നാണ് പൊലീസിന്റെ പ്രാഥമിക നിഗമനം. മരണത്തിൽ സിനിമ- സീരിയൽ രംഗത്തെ പ്രമുഖർ അനുശോചനം രേഖപ്പെടുത്തി.
