തിരുവനന്തപുരം: ഉപതെരഞ്ഞെടുപ്പിൽ പാലക്കാട്, ചേലക്കര മണ്ഡലങ്ങളിൽ നിന്ന് വിജയിച്ച എംഎൽഎമാർ സത്യപ്രതിജ്ഞ ചെയ്തു. പാലക്കാട് എംഎൽഎ രാഹുൽ മാങ്കൂട്ടത്തിലും ചേലക്കര എംഎൽഎ യു.ആർ. പ്രദീപുമാണ് സത്യപ്രതിജ്ഞ ചെയ്ത് സഭാംഗങ്ങളായി ചുമതലയേറ്റത്. സ്പീക്കർ എ.എൻ. ഷംസീറിന്റെ മുൻപാകെയായിരുന്നു സത്യപ്രതിജ്ഞ.
നിയമസഭയിലെ ശങ്കര നാരായണൻ തമ്പി ഹാളിൽ നടന്ന ചടങ്ങിൽ യു.ആർ പ്രദീപ് സഗൗരവവും രാഹുൽ മാങ്കൂട്ടത്തിൽ ദൈവനാമത്തിലുമാണ് സത്യവാചകം ചൊല്ലിയത്. പുതിയ എംഎൽഎമാരെ സ്പീക്കർ എ.എൻ. ഷംസീർ, മുഖ്യമന്ത്രി പിണറായി വിജയൻ, പ്രതിപക്ഷ നേതാവ് വി.ഡി. സതീശൻ എന്നിവർ ചേർന്ന് സ്വീകരിച്ചു. പാർട്ടി പ്രവർത്തകർക്കും അടുത്ത ബന്ധുക്കൾക്കുമൊപ്പമാണ് പ്രദീപും രാഹുലും സത്യപ്രതിജ്ഞയ്ക്ക് എത്തിയത്.
മന്ത്രിമാരായ കെ കൃഷ്ണൻകുട്ടി, പി പ്രസാദ്, രാമചന്ദ്രൻ കടന്നപ്പള്ളി, സജി ചെറിയാൻ, എ കെ ശശീന്ദ്രൻ, കെ രാജൻ, ഗണേഷ് കുമാർ, ചീഫ് വിപ്പ് എൻ ജയരാജ് തുടങ്ങിയവർ സംബന്ധിച്ചു.
