ചെന്നൈ: തമിഴ്‌നാട് ദിണ്ടിഗലിൽ സ്വകാര്യ ആശുപത്രിയിൽ തീപിടിത്തം. അപകടത്തിൽ മൂന്ന് വയുകാരൻ ഉൾപ്പെടെ 7 പേർ മരിച്ചു. രാത്രി ഒമ്പതരയോടെയാണ് തീപിടിത്തമുണ്ടായത്. അപകടസമയത്ത് ജീവനക്കാർ ഉൾപ്പെടെ നൂറോളം പേർ പുറത്തിറങ്ങാനാകാതെ ആശുപത്രിയിൽ കുടുങ്ങിയിരുന്നു.
ആശുപത്രിയുടെ ലിഫ്റ്റിൽ ഉൾപ്പെടെ ആളുകൾ കുടുങ്ങി. പൊലീസും അഗ്‌നിശമന സേനയും ചേർന്നാണ് ഉളളിൽ കുടുങ്ങിയവരെ പുറത്തെത്തിച്ചത്. ദിണ്ടിഗലിലെ ഓർത്തോപീഡിക് ആശുപത്രിയിലാണ് ദുരന്തം ഉണ്ടായത്. 20 ലേറെ പേർക്ക് പൊള്ളലേറ്റിട്ടുണ്ട്. പരിക്കേറ്റവരെ ആശുപത്രികളിൽ പ്രവേശിപ്പിച്ചു.
തീപിടിത്തത്തിന്റെ കാരണം വ്യക്തമല്ലെന്ന് പൊലീസ് പറഞ്ഞു. 50 ലധികം ആംബുലൻസുകൾ ആശുപത്രിയിൽ വ്യന്യസിച്ചിട്ടുണ്ട്. മരണനിരക്ക് ഉയരാൻ സാധ്യതയുണ്ടെന്നും പൊലീസ് വ്യക്തമാക്കി. ഗ്രൗണ്ട് ഫ്ളോറിൽ റിസപ്ഷൻ ഭാഗത്ത് നിന്നാണ് തീ പടർന്നു പിടിച്ചതെന്നാണ് പ്രാഥമിക നിഗമനം.
ഷോർട്ട് സർക്യൂട്ടാണ് കാരണമെന്നാണ് വിലയിരുത്തുന്നത്. വിശദമായ പരിശോധനകൾ നടന്നുവരികയാണ്. ഗ്രൗണ്ട് ഫ്ളോറിൽ നിന്നും വളരെ വേഗം തീ മറ്റ് നിലകളിലേക്കും പടരുകയായിരുന്നു. കനത്ത പുകയിൽ പലർക്കും ശ്വാസംമുട്ടലും ഉണ്ടായി. ദിണ്ടിഗൽ സർക്കാർ ആശുപത്രിയിൽ മാത്രം 30 ലധികം പേരെ പ്രവേശിപ്പിച്ചിട്ടുണ്ട്.
