തിരുവനന്തപുരം: അനധികൃതമായി സാമൂഹ്യക്ഷേമ പെൻഷൻ കൈപ്പറ്റിയ സംഭവത്തിൽ സർക്കാർ ഉദ്യോഗസ്ഥർക്കെതിരെ നടപടി. കൃഷി വകുപ്പിലെ ആറ് ഉദ്യോഗസ്ഥരെ സസ്പെൻഡ് ചെയ്തു. മണ്ണ് സുരക്ഷാ വിഭാഗത്തിലെ ഉദ്യോഗസ്ഥർക്കെതിരെയാണ് നടപടി. ഓഫീസിലെ ഉന്നത ഓഫീസർ മുതൽ പാർട്ട് ടൈം സ്വീപ്പർ വരെ അനധികൃതമായി പെൻഷൻ കൈപ്പറ്റിയതായി കണ്ടെത്തിയിരുന്നു. 18 ശതമാനം പലിശ സഹിതം തുക തിരിച്ച അടക്കാനും അധികൃതർ നിർദേശിച്ചു.
കാസർകോട് ജില്ലാ മണ്ണ് സംരക്ഷണ ഓഫീസ് ഗ്രേഡ് -2 അറ്റൻഡർ സാജിത കെ.എ, വടകര മണ്ണ് സംരക്ഷണ ഓഫീസ് വർക്ക് സുപ്രണ്ട് നസീദ് മുബാറക്ക്, പത്തനംതിട്ട മണ്ണ് സംരക്ഷണ ഓഫീസ് പാർട്ട് ടൈം സ്വീപ്പർ ഷീജാകുമാരി ജി, മീനങ്ങാടി മണ്ണ് സംരക്ഷണ ഓഫീസ് പാർട്ട് ടൈം സ്വീപ്പർ ഭാർഗവി പി, മീനങ്ങാടി മണ്ണ് പര്യവേഷണ അസിസ്റ്റന്റ് ഡയറക്ടറുടെ കാര്യാലയം പാർട്ട് ടൈം സ്വീപ്പർ ലീല കെ, തിരുവനന്തപുരം സെൻട്രൽ സോയിൽ അനലറ്റിക്കൽ ലാബ് പാർട്ട് ടൈം സ്വീപ്പർ രജനി എന്നിവർക്കെതിരെയാണ് ആദ്യഘട്ടത്തിൽ നടപടിയെടുത്തിരിക്കുന്നത്.
സംസ്ഥാനത്തെ 1458 സർക്കാർ ജീവനക്കാർ സാമൂഹ്യക്ഷേമ പെൻഷൻ കൈപ്പറ്റിയെന്നാണ് വിവരം. ധനവകുപ്പിന്റെ നിർദേശപ്രകാരം ഇൻഫർമേഷൻ കേരള മിഷൻ നടത്തിയ പരിശോധനയിലാണ് ഗുരുതര തട്ടിപ്പ് കണ്ടെത്തിയത്. ഗവൺമെന്റ് കോളേജ് പ്രൊഫസർമാർ, ഗസറ്റഡ് ഉദ്യോഗസ്ഥർ, ഹയർസെക്കൻഡറി അദ്ധ്യാപകർ തുടങ്ങി ഉയർന്ന ശമ്പളം വാങ്ങുന്ന സർക്കാർ ജീവനക്കാർ അടക്കം പെൻഷൻ കൈപ്പറ്റിയവരിൽ ഉൾപ്പെടുന്നു.
അനധികൃതമായി പെൻഷൻ കൈപ്പറ്റിയവരുടെ പട്ടിക പുറത്തായപ്പോൾ ഉദ്യോഗസ്ഥർക്കെതിരെ നടപടി സ്വീകരിക്കാത്തതിനെതിരെ പ്രതിഷേധങ്ങളും വിമർശങ്ങളും ഉയർന്നിരുന്നു. കാർഷിക വികസന കമ്മീഷന്റെ നേതൃത്വത്തിൽ ചേർന്ന യോഗത്തിലാണ് മണ്ണ് സംരക്ഷണ വകുപ്പിലെ ഉദ്യോഗസ്ഥർ ക്ഷേമ പെൻഷൻ കൈപ്പറ്റിയതായി കണ്ടെത്തിയത്. ഇതോടെ ഇവരെ സസ്പെൻഡ് ചെയ്യാൻ തീരുമാനിക്കുകയായിരുന്നു. മണ്ണ് പര്യവേഷണ- മണ്ണ് സംരക്ഷണ വകുപ്പ് ഡയറക്ടർ സാജു കെ. സുരേന്ദ്രനാണ് ഇത് സംബന്ധിച്ച് ഉത്തരവിറക്കിയത്.
