മലയാളത്തിന് ഒരു പാൻ ഇന്ത്യൻ റീച്ച് കൊണ്ടുവന്ന സിനിമയാണ് ദൃശ്യമെന്ന് മോഹൻലാൽ. ദൃശ്യം- 2 കണ്ടതിന് ശേഷം പുറത്തുള്ള ആളുകൾ കൂടുതൽ മലയാളം സിനിമ കാണാൻ തുടങ്ങിയെന്നും ദൃശ്യം -3 കൊണ്ടുവരാനുള്ള ശ്രമത്തിലാണ് തങ്ങളെന്നും മോഹൻലാൽ പറഞ്ഞു. തമിഴ് സ്വകാര്യ യൂട്യൂബ് ചാനലിൽ സുഹാസിനിക്ക് നൽകിയ അഭിമുഖത്തിലാണ് ദൃശ്യം സിനിമയെ കുറിച്ച് മോഹൻലാൽ പറയുന്നത്.
‘ചിത്രത്തിന്റെ സംവിധായകൻ ഒരുപാട് പേരോട് കഥ പറഞ്ഞിട്ടുണ്ട്. പക്ഷേ, അവർക്ക് ഈ സിനിമ ബോധിച്ചില്ല. സിനിമ ഷൂട്ട് ചെയ്യുന്നതിന് അഞ്ച് വർഷം മുമ്പ് തന്നെ അതിന്റെ തിരക്കഥ സംവിധായകന്റെ കയ്യിലുണ്ടായിരുന്നു. ആന്റണി പെരുമ്പാവൂരാണ് കഥയെ കുറിച്ച് എന്നോട് പറഞ്ഞത്. കേട്ടപ്പോൾ ഞാൻ ഞെട്ടിപ്പോയി”.
“ഒരു സിനിമ ഹിറ്റാകണമെങ്കിൽ അതിൽ വ്യത്യസ്തമായി എന്തെങ്കിലും ഉണ്ടാവണം. സിനിമ കണ്ടുകഴിഞ്ഞാൽ വീട്ടിലേക്ക് കൊണ്ടുപോകാൻ നമുക്ക് എന്തെങ്കിലും ഉണ്ടാകണം. കുടുംബത്തിന് വേണ്ടിയുള്ള സ്നേഹമായിരുന്നു ആ ചിത്രത്തിൽ ഉണ്ടായിരുന്നത്.
ദൃശ്യം 2 പ്ലാൻ ചെയ്യുന്ന സമയത്താണ് കൊവിഡ് വന്നത്. ലോകമെമ്പാടുമുള്ള ആളുകൾ ചിത്രം കണ്ടു. കുറച്ച് നാളുകൾക്ക് മുമ്പ് ഗുജറാത്തിൽ സിനിമയുടെ ചിത്രീകരണം നടക്കുമ്പോൾ അവിടെയുള്ള ആളുകൾ ദൃശ്യം സിനിമ കാരണം തന്നെ തിരിച്ചറിഞ്ഞ അനുഭവവും മോഹൻലാൽ പങ്കുവച്ചു.
