ആറുവർഷത്തെ ഇടവേള, കേരളം രഞ്ജി ക്വാർട്ടറിൽ; ബിഹാറിനെതിരെ കൂറ്റൻ ജയം

തിരുവനന്തപുരം: നിർണായക മത്സരത്തിൽ ബിഹാറിനെ ഇന്നിം​ഗ്സിനും 168 റൺസിനും തകർത്ത് കേരളം രഞ്ജി ട്രോഫി ക്വാർട്ടറിൽ. ആറുവർഷത്തെ ഇടവേളയ്‌ക്ക് ശേഷമാണ് ക്വാർട്ടർ പ്രവേശനം. ബിഹാറിനെ ആദ്യ ഇന്നിം​ഗ്സിൽ 64 റൺസിനും രണ്ടാം ഇന്നിം​ഗ്സിൽ 118 റൺസിനുമാണ് പുറത്താക്കിയത്. ജലജ് സക്സേനയുടെ പത്തു വിക്കറ്റ് പ്രകടനമാണ് കേരളത്തിന്റെ അശ്വമേധത്തിന് കരുത്തായത്. മത്സരത്തിന്റെ രണ്ടാം ദിനത്തിൽ തന്നെ ബിഹാറിനെ രണ്ടുവട്ടം പുറത്താക്കി കേരളത്തിന് ഉജ്ജ്വല വിജയം സമ്മാനിച്ചത് ബൗളർമാരാണ്. സ്കോർ കേരളം -351, ബിഹാർ-64,118

ആദ്യ ഇന്നിം​ഗ്സിൽ 23.1 ഓവറിൽ പുറത്തായ ബിഹാർ ഫോൺ ഓൺ ചെയ്തു. രണ്ടാം ഇന്നിം​ഗ്സിലും കേരള ബൗളർമാരുടെ കണിശതയിൽ ബിഹാറിന് പിടിച്ചുനിൽക്കാനായില്ല. 41.1 ഓവറിൽ അവർ പുറത്തായതോട കേരളത്തിന് ത്രസിപ്പിക്കുന്ന ജയം. ആദിത്യ സർവാതെ മൂന്നു വിക്കറ്റ് വീഴ്‌ത്തിയപ്പോൾ എം.ഡി നിധീഷ്, വൈശാഖ് ചന്ദ്രൻ എന്നിവരും തിളങ്ങി. 31 റൺസ് നേടിയ ഷാക്കിബുൽ ​ഗനിയാണ് അവരുടെ രണ്ടാം ഇന്നിം​ഗ്സിലെ ടോപ് സ്കോറർ. ക്യാപ്റ്റൻ വീർ പ്രതാപ് സിം​ഗ് 30 റൺസെടുത്തു. 15 റൺസെടുത്ത ശ്രമൺ നി​ഗ്രോധ് ആണ് രണ്ടക്കം കടന്ന മറ്റൊരു ബാറ്റർ. എലൈറ്റ് ​ഗ്രൂപ്പ് സിയിൽ നിന്നാണ് കേരളം ക്വാർട്ടറിലേക്ക് മാർച്ച് ചെയ്തത്.