തിരുവനന്തപുരം: അർജുൻ ആയങ്കിയെ കരുതൽ കസ്റ്റഡിയിലെടുത്ത് പൊലീസ്. നിരവധി കേസുകളിൽ പ്രതിയായ അർജുൻ ആയങ്കിയെ തിരുവനന്തപുരത്ത് നിന്നാണ് കഴക്കൂട്ടം പൊലീസ് പിടികൂടിയത്. കരുതൽ തടങ്കലിൽ എടുത്തതാണെന്ന് പൊലീസ് വ്യക്തമാക്കി.
കഴക്കൂട്ടത്തെ മറ്റൊരു ഗുണ്ടയുടെ വീട്ടിൽ നിന്നാണ് അർജുൻ ആയങ്കിയെ പൊലീസ് പിടികൂടിയത്. ഗുണ്ടാപ്പട്ടികയിലുള്ള ആദർശിന്റെ വീട്ടിൽ പരിശോധനയ്ക്ക് എത്തിയതായിരുന്നു പൊലീസ്. കുളത്തൂരിലെ ക്ഷേത്രോത്സവത്തോട് അനുബന്ധിച്ച് റൗഡി ലിസ്റ്റിലുള്ളവരെ തേടിയെത്തിയതായിരുന്നു. തുടർന്നാണ് അർജുൻ ആയങ്കിയെ കാണാനിടയായത്. ഇതോടെ കസ്റ്റഡിയിലെടുക്കുകയായിരുന്നു.
ഡിവൈഎഫ്ഐ പ്രവർത്തകനായിരുന്ന അർജുൻ ആയങ്കി സ്വർണക്കടത്ത് ക്വട്ടേഷൻ കേസിലെ പ്രതിയായിരുന്നു. കരിപ്പൂർ വിമാനത്താവളം വഴിയുള്ള സ്വർണക്കടത്ത് കേസുമായി ബന്ധപ്പെട്ട് ഇയാൾ അറസ്റ്റിലാവുകയും ചെയ്തിരുന്നു.
