ചെന്നൈ : രാമേശ്വരത്ത് പുതിയ പാമ്പൻ റെയിൽവേ പാലം പ്രധാനമന്ത്രി നരേന്ദ്ര മോദി ഉദ്ഘാടനം ചെയ്തു. ശ്രീലങ്കയിലെ അനുരാധപുരയിൽ നിന്ന് ഇന്ത്യൻ വ്യോമസേനയുടെ സൈനിക ഹെലികോപ്റ്ററിലാണ് പ്രധാനമന്ത്രി ചടങ്ങിൽ പങ്കെടുക്കാൻ എത്തിയത്. ഹെലിപാഡിൽ നിന്ന് അദ്ദേഹം കാറിൽ പാമ്പൻ പാലത്തിന്റെ മധ്യത്തിൽ സജ്ജീകരിച്ച പ്ലാറ്റ്‌ഫോമിലേക്ക് പോയി. തമിഴ്‌നാടിന്റെ പരമ്പരാഗത വസ്ത്രമായ മുണ്ടും ഷർട്ടും ധരിച്ചായിരുന്നു പ്രധാനമന്ത്രിയുടെ വരവ്.
സ്റ്റേജിൽ നിന്ന് റിമോട്ട് കൺട്രോൾ വഴി അദ്ദേഹം പുതിയ റെയിൽവേ പാലം തുറന്നുകൊടുത്ത് രാഷ്‌ട്രത്തിന് സമർപ്പിച്ചു. പാലത്തിന്റെ പ്രവർത്തനത്തിന് സാക്ഷ്യം വഹിച്ച് കൊണ്ട് റോഡ് പാലത്തിൽ നിന്ന് അദ്ദേഹം ട്രെയിൻ ഫ്ലാഗ് ഓഫ് ചെയ്തു. പാലത്തിനടിയിലൂടെ കടന്നുപോയ തീരദേശ സേനയുടെ കപ്പലിന്റെ ഫ്‌ളാഗ് ഓഫ് കർമ്മവും പ്രധാനമന്ത്രി നിർവഹിച്ചു.
1914-ൽ നിർമ്മിച്ച പഴയ പാലത്തിന് പകരമായിരിക്കും പുതിയ പാമ്പൻ പാലം. തുരുമ്പെടുക്കൽ ഉൾപ്പെടെയുള്ള വിവിധ പ്രശ്നങ്ങൾ കാരണം 2022-ൽ ആണ് പഴയ പാലം അടച്ചുപൂട്ടിയത്.
ശ്രീലങ്കയിൽ നിന്ന് ഇന്ത്യൻ വ്യോമസേനയുടെ എംഐ 17 ഹെലികോപ്റ്ററിൽ വേദിയിലെത്തിയ പ്രധാനമന്ത്രി മോദിയെ ഗവർണർ ആർ.എൻ. സ്വീകരിച്ചു. രവി, കേന്ദ്രമന്ത്രി എൽ. മുരുകൻ, റെയിൽവേ മന്ത്രി അശ്വിനി വൈഷ്ണവ് എന്നിവർ പങ്കെടുത്തു.
തമിഴ്നാട് ധനമന്ത്രി തങ്കം തെന്നരസു, രാജകണ്ണപ്പൻ, രാമനാഥപുരം എം.പി. നവാസ് ഗനി, എംപി ജി.കെ. വാസൻ, ബിജെപി എംഎൽഎമാരായ നയിനാർ നാഗേന്ദ്രൻ, വനതി ശ്രീനിവാസൻ, സുധാകർ റെഡ്ഡി, എച്ച്. രാജ, തമിഴ്നാട് ബിജെപി അധ്യക്ഷൻ അണ്ണാമലൈ, പൊൻ. രാധാകൃഷ്ണൻ, തമിഴിസൈ സൗന്ദരരാജൻ, തുടങ്ങിയവർ സമ്മേളനത്തിൽ പങ്കെടുത്തു. രാമനാഥപുരം കളക്ടർസ്വാഗതം പറഞ്ഞു.
കടലിന് മുകളിലൂടെ നിർമ്മിച്ച ഇന്ത്യയിലെആദ്യത്തെ റെയിൽവേ പാലം എന്ന ബഹുമതി പാമ്പൻ പാലത്തിനാണ്.
തുടർന്ന് പ്രധാനമന്ത്രി മോദി 1000 കോടി രൂപയുടെ പുതിയ പദ്ധതികൾ ഉദ്ഘാടനം ചെയ്തു. പുതിയ പാമ്പൻ റെയിൽവേ പാലം ഉദ്ഘാടനം ചെയ്ത ശേഷം പ്രധാനമന്ത്രി രാമേശ്വരത്തെ രാമനാഥസ്വാമി ക്ഷേത്രത്തിൽ ദർശനം നടത്തി.
