മോഹൻലാൽ പ്രധാന വേഷത്തിലെത്തുന്ന ഹൃദയപൂർവ്വം സിനിമയുടെ റിലീസ് തീയതി പ്രഖ്യാപിച്ചു. മോഹൻലാലിന്റെ ഫെയ്സ്ബുക്ക് അക്കൗണ്ടിലൂടെയാണ് റിലീസ് തീയതി പുറത്തുവിട്ടത്. ഓണം റിലീസായി ഓഗസ്റ്റ് 28-നാണ് സിനിമ തിയേറ്ററുകളിലെത്തുക. മോഹൻലാലും സംഗീത് പ്രതാപുമാണ് ചിത്രത്തിൽ പ്രധാന വേഷങ്ങൾ അവതരിപ്പിക്കുന്നത്. ഇരുവരും ഒരുമിച്ചുള്ള പോസ്റ്ററാണ് അണിയറപ്രവർത്തകർ പുറത്തുവിട്ടിരിക്കുന്നത്.
മാളവിക മോഹനനാണ് ചിത്രത്തിലെ നായിക. കോമഡി എന്റർടെയിൻമെന്റ് സിനിമയായാണ് ഹൃദയപൂർവ്വം പ്രേക്ഷകർക്ക് മുന്നിലെത്തുന്നത്. സത്യൻ അന്തിക്കാട് സംവിധാനം ചെയ്യുന്ന ചിത്രം ആശിർവാദ് സിനിമാസാണ് നിർമിക്കുന്നത്.
എന്നും എപ്പോഴും എന്ന ചിത്രത്തിന് ശേഷം മോഹൻലാലും സത്യൻ അന്തിക്കാടും ഒരുമിക്കുന്ന ചിത്രമാണ് ഹൃദയപൂർവ്വം. ഇരുവരും ഒന്നിച്ച 20-ാമത്തെ ചിത്രം കൂടിയാണിത്. ചിത്രത്തിന്റെ ഫസ്റ്റ്ലുക്ക് പോസ്റ്റർ മോഹൻലാലിന്റെ പിറന്നാൾ ദിനം പുറത്തുവന്നിരുന്നു. മോഹൻലാൽ ആരാധകർ ഏറെ പ്രതീക്ഷയോടെ കാത്തിരിക്കുന്ന ചിത്രമാണിത്.
