കോട്ടയം: ഗൂഗിൾ മാപ്പ് നോക്കി സഞ്ചരിക്കുന്നതിനിടെ ദിശതെറ്റിയ ഇലക്ട്രിക് കാർ കുറുപ്പന്തറ കടവിലെ തോട്ടിൽ വീണു. യാത്രികർ അത്ഭുതകരമായാണ് രക്ഷപ്പെട്ടത്. കോട്ടയം ചെത്തിപ്പുഴ സ്വദേശി ജോസി ജോസഫ് (62), ഭാര്യ ഷീബ (58) എന്നിവർ സഞ്ചരിച്ച കാറാണ് അപകടത്തിൽപ്പെട്ടത്.
ഇന്നലെ രാവിലെ 11 മണിയോടെയാണ് അപകടമുണ്ടായത്. തോട്ടിലേക്കിറങ്ങാനുള്ള വഴിയിൽ കെട്ടിനിന്ന വെള്ളം കാറിനുള്ളിലേക്ക് കയറി. ഇത് കണ്ടതോടെ ജോസിയും ഷീബയും ഉടൻ ഡോർ തുറന്ന് പുറത്തിറങ്ങി. ഒന്നരയടി കൂടി മുന്നോട്ട് പോയെങ്കിൽ നിറഞ്ഞൊഴുകുന്ന തോട്ടിലേക്ക് വീണ് വൻ അപകടം സംഭവിക്കുമായിരുന്നു. നാട്ടുകാരും സമീപത്തെ തടിമില്ലിലെ തൊഴിലാളികളും ചേർന്നാണ് രക്ഷാപ്രവർത്തനം നടത്തിയത്.
