ന്യൂഡൽഹി: രാജ്യത്ത് ഇന്ന് മുതൽ പ്രാബല്യത്തിൽ വരുന്ന ജിഎസ്ടി പരിഷ്കാരങ്ങൾ എല്ലാ ഭാരതീയരിലും സന്തോഷം പകരുമെന്ന് പ്രധാനമന്ത്രി നരേന്ദ്രമോദി. ജിഎസ്ടി കുറയ്ക്കുന്നതിലൂടെ ഓരോ കുടുംബത്തിനും കൂടുതൽ സമ്പാദിക്കാനും ചെലവ് കുറയ്ക്കാനും സാധിക്കുമെന്നും പ്രധാനമന്ത്രി പറഞ്ഞു. എക്സിലൂടെയാണ് അദ്ദേഹം പ്രതികരിച്ചത്.
ജിഎസ്ടി പരിഷ്കരണം രാജ്യത്ത് ആരവം സൃഷ്ടിച്ചിരിക്കുകയാണ്. ചെലവുകൾ കുറഞ്ഞത് ഓരോ വീട്ടിലും പുഞ്ചിരിയും സന്തോഷവും കൊണ്ടുവരുന്നു. ഈ പരിഷ്കാരങ്ങൾ എല്ലാ മേഖലകളിലും സമ്പാദ്യം വർദ്ധിപ്പിക്കും. ചെറുകിട, ഇടത്തര സംരംഭങ്ങളെ പ്രോത്സാഹിപ്പിക്കാനും സാമ്പത്തിക വളർച്ച മെച്ചപ്പെടുത്താനും ഇത് സഹായിക്കും. പരിഷ്കാരങ്ങൾക്ക് മുമ്പും ശേഷവുമുള്ള നികുതികൾ സൂചിപ്പിക്കുന്ന ബോർഡുകൾ കാണുമ്പോൾ സന്തോഷം തോന്നുന്നു.
ആദായനികുതി ഇളവുകളും ജിഎസ്ടി പരിഷ്കാരങ്ങളും ചേർന്നാണ് ജനങ്ങൾക്ക് 2.5 ലക്ഷം കോടി രൂപയുടെ സമ്പാദ്യമാകും. കഴിഞ്ഞ കുറച്ച് വർഷങ്ങൾക്കുള്ളിൽ 25 കോടിയിലധികം ആളുകൾ ദാരിദ്ര്യത്തിൽ നിന്ന് കരകയറി. സാമ്പത്തികഭദ്രതയും നേടിയിട്ടുണ്ട്. വാഹനം വാങ്ങുക, വീട്ടുപകരണങ്ങൾ വാങ്ങുക, പുറത്തുനിന്ന് ഭക്ഷണം കഴിക്കുക, യാത്ര പോവുക തുടങ്ങിയ പല ആഗ്രഹങ്ങളും നിറവേറ്റാൻ എളുപ്പമാണ്. ഈ പരിഷ്കാരങ്ങൾ നമ്മുടെ പ്രാദേശിക നിർമാണ അടിത്തറയെ ശക്തിപ്പെടുത്തുമെന്നും ആത്മനിർഭർ ഭാരതത്തിലേക്ക് വഴിയൊരുക്കുമെന്നും പ്രധാനമന്ത്രി പറഞ്ഞു.
