കാബൂള്: അഫ്ഗാനിസ്ഥാനിൽ താലിബാന് സര്ക്കാര് ഏര്പ്പെടുത്തിയ ഇന്റര്നെറ്റ്, ടെലികോം സേവന നിരോധനം പിന്വലിച്ചു. ഇതിനെത്തുടർന്ന് നിരവധി സ്ഥലങ്ങളിൽ അഫ്ഗാന് ജനത തെരുവിലിറങ്ങി ആഘോഷിച്ചതായി റിപ്പോർട്ടുണ്ട്. താലിബാന് പ്രധാനമന്ത്രിയുടെ നിര്ദേശപ്രകാരമാണ് ഇന്റര്നെറ്റ് പുനസ്ഥാപിച്ചത് എന്ന് ബിബിസി റിപ്പോര്ട്ട് ചെയ്യുന്നു. രാജ്യത്ത് ഭാഗികമായി മാത്രം ഇന്റര്നെറ്റ് പുനസ്ഥാപിക്കപ്പെട്ടുവെന്ന് നിരീക്ഷണ സ്ഥാപനമായ നെറ്റ്ബ്ലോക്ക്സ് സ്ഥിരീകരിച്ചു. എന്നാൽ ബുധനാഴ്ച്ച ഉച്ചയോടെ എല്ലാ ഇന്റര്നെറ്റ് സംവിധാനങ്ങളും പുനസ്ഥാപിച്ചതായി ഖത്തറിലെ മുന് താലിബാന് വക്താവ് സുഹൈല് ഷാഹീന് പറഞ്ഞു.
സമ്പൂർണ്ണ നിരോധനം നിലവിൽ വന്നതോടെ അഫ്ഗാനിലെ വിമാനസർവീസും , ബാങ്കിംഗ് സേവനങ്ങളും താറുമാറായിരുന്നു . മൊബൈൽ ഇന്റർനെറ്റിന് പുറമെ സാറ്റ്ലൈറ്റ് ടിവിയും തടസപ്പെട്ടിരുന്നു. കാബൂൾ വിമാനത്താവളത്തിൽ നിന്നുള്ള വിമാന സർവീസുകളും തടസ്സപ്പെട്ടതായി പ്രാദേശിക മാധ്യമങ്ങൾ റിപ്പോർട്ട് ചെയ്തിട്ടുണ്ട്.
ഇന്റർനെറ്റ് സേവനങ്ങൾ വിച്ഛേദിക്കാനുള്ള നടപടികൾ മുൻപുള്ള രണ്ടാഴ്ചയായി താലിബാൻ സ്വീകരിച്ചു വരികയായിരുന്നു. അനാശാസ്യ പ്രവർത്തികൾ തടയാനാണ് നിരോധനമെന്നാണ് സർക്കാർ വിശദീകരണം.2021 ഓഗസ്റ്റിൽ താലിബാൻ അധികാരം പിടിച്ചെടുത്തതിനുശേഷം അഫ്ഗാനിസ്ഥാനിൽ ഇത്തരത്തിൽ ഒരു പൂർണ്ണ അടച്ചുപൂട്ടൽ സംഭവിക്കുന്നത് ഇതാദ്യമായാണ്.
അധികാരത്തിൽ വന്നതിന് ശേഷം വനിതകൾ വീടിന് പുറത്തിറങ്ങി തൊഴിൽ ചെയ്യുന്നതും സ്കൂളുകളിലും സർവകലാശാലകളിലും പഠിക്കുന്നതും താലിബാൻ വിലക്കിയിരുന്നു.അടുത്തിടെ അഫ്ഗാനിസ്ഥാനിലെ സർവകലാശാലാ പാഠ്യ പദ്ധതിയിൽ സ്ത്രീകൾ എഴുതിയ പുസ്തകങ്ങൾ താലിബാൻ ഭരണകൂടം നിരോധിച്ചിരുന്നു .
താലിബാൻ നയങ്ങൾക്ക് വിരുദ്ധമെന്ന് കാട്ടി ശാസ്ത്ര സംബന്ധമായത് അടക്കം 680 പുസ്തകങ്ങൾക്കാണ് വിലക്കേർപ്പെടുത്തിയത്. മതനിയമങ്ങൾക്ക് വിരുദ്ധമെന്ന് കാട്ടി 18 വിഷയങ്ങളും സർക്കാർ നിരോധിച്ചു.
ഇന്റർനെറ്റ് തടസ്സം അഫ്ഗാനിസ്ഥാനെ ഏതാണ്ട് ഒറ്റപ്പെടുത്തുമെന്നും , സാമ്പത്തിക സ്ഥിരതയ്ക്ക് ഭീഷണിയാകുമെന്നും ലോകത്തിലെ ഏറ്റവും ഗുരുതരമായ മാനുഷിക പ്രതിസന്ധികളിൽ ഒന്നായി ഇത് മാറുമെന്നും യുഎൻ മുന്നറിയിപ്പ് നൽകി. ബ്ലാക്ക്ഔട്ടിനിടെ കാബൂളിലെ തെരുവുകൾ ശാന്തമായിരുന്നു, ബാങ്കുകൾ അടച്ചിരുന്നു, ഷോപ്പിംഗ് സെന്ററുകൾ ശൂന്യമായിരുന്നു, പണ കൈമാറ്റ സേവനങ്ങൾ നിർത്തിവച്ചു, വിദേശത്തുള്ള അഫ്ഗാനികളിൽ നിന്നുള്ള പണമടയ്ക്കൽ തടഞ്ഞു. വിമാനങ്ങൾ റദ്ദാക്കുകയും ട്രാവൽ ഏജന്റുമാർ ഭൂരിഭാഗവും ഓഫീസുകൾ അടച്ചിടുകയും ചെയ്തു.
