ന്യൂഡൽഹി: ഇന്ത്യൻ നാവികസേനയ്ക്ക് കരുത്ത് പകർന്നുകൊണ്ട് ഇന്ത്യൻ കോസ്റ്റ് ഗാർഡിന്റെ പുതിയ കപ്പലായ ഐസിജിഎസ് അക്ഷർ കമ്മീഷൻ ചെയ്തു. ആത്മനിർഭർ ഭാരതത്തിന് കീഴിൽ നിർമിച്ച കപ്പലാണ് കമ്മീഷൻ ചെയ്തത്. പ്രതിരോധ മന്ത്രാലയത്തിലെ മുതിർന്ന ഉദ്യോഗസ്ഥരായ ഐഡിഎഎസ് ദീപ്തി മോഹിൽ, കോസ്റ്റ് ഗാർഡ് കമാൻഡർ, കേന്ദ്ര സംസ്ഥാന-സർക്കാരുകളുടെ മുതിർന്ന ഉദ്യോഗസ്ഥരും കമ്മീഷൻ ചടങ്ങിൽ പങ്കെടുത്തു.
കടൽമാർഗമുള്ള ശത്രുക്കളുടെ കടന്നുകയറ്റം നിരീക്ഷിക്കുന്നതിനും സംരക്ഷണം ഒരുക്കുന്നതിനും ഉപകാരപ്രദമാണ് ഐസിജിഎസ് അക്ഷർ കപ്പൽ. സമുദ്രനിരീക്ഷണം കൂടുതൽ ശക്തമാക്കാൻ ഇതിലൂടെ സാധിക്കും.
ഗോവ ഷിപ് യാർഡ് ലിമിറ്റഡാണ് കപ്പൽ നിർമിച്ചത്. 320 ടൺ ഭാരമുള്ള കപ്പലിന് 3,000 കിലോവാട്ട് ഇരട്ട ഡീസൽ എഞ്ചിനുകളാണുള്ളത്. 27 നോട്ടിക്കൽ മൈൽ വേഗതയിൽ വരെ സഞ്ചരിക്കാൻ ഇവയ്ക്ക് സാധിക്കും. അത്യാധുനിക സംവിധാനങ്ങളോടെയാണ് പുതിയ കപ്പൽ നിർമിച്ചിരിക്കുന്നത്. റിമോട്ട് കൺട്രോൾ മെഷീൻ ഗണ്ണുകൾ ഉൾപ്പെടെ നിരവധി ആയുധങ്ങൾ കപ്പലിൽ സജ്ജീകരിച്ചിട്ടുണ്ട്. പ്രവർത്തനക്ഷമത വർദ്ധിപ്പിക്കുന്നതിനായി ഇന്റഗ്രേറ്റഡ് ബ്രിഡ്ജ് സിസ്റ്റം, പ്ലാറ്റ്ഫോം മാനേജ്മെന്റ് സിസ്റ്റം, ഓട്ടോമേറ്റഡ് പവർ മാനേജ്മെന്റ് സിസ്റ്റം തുടങ്ങിയ നൂതന സംവിധാനങ്ങളും സ്ഥാപിച്ചിട്ടുണ്ട്.
തീരദേശ നിരീക്ഷണം, കള്ളക്കടത്ത്, സമുദ്ര സുരക്ഷ എന്നിവയാണ് ലക്ഷ്യമിടുന്നത്. അക്ഷർ കമ്മീഷൻ ചെയ്യുന്നത് സമുദ്രാതിർത്തികൾ സംരക്ഷിക്കുന്നതിനുള്ള ദൗത്യം ശക്തിപ്പെടുത്തുമെന്ന് മുതിർന്ന ഉദ്യോഗസ്ഥർ പ്രതികരിച്ചു.
